Sarmur 4

Kain ma Habel

1Rarirya Adam vye oser 1kuker swar Hawa i. Vin ani fyadores ma daven romawa snonya, mura ikofen, “Kuker fanfnovek ro Manseren Allah I yasmai kwar romawa snon ine.” Inja nyir i ve Kain.2 2Posa Hawa daven romawa snon iya wer, nyir i ve Habel. Habel inido manfarandous aiwan domba, imboi Kain inido manamom. 3Fafisu ri veso nasyonde ido Kain dun ro yaf vyanna rovean na fa vyuki farsarser ve Manseren Allah I. 4Habel ikako dun domba mkun rak oso ro domba vyansi, kyaruk i, insape fyarser kraf ma mafen vepyum kaku na faro Manseren Allah I. Manseren Allah imarisen faro Habel farsarser vyena,3 5imboi Kyurpum Kain farsarser vyena. Inja Kain imsor kaku, ma myam karfiva. 6Mura Manseren Allah ifuken faro Kain i, “Rosai evedar wamsorya? Rosai evedar mam karfivaya? 7Rofyor wafrur roi vepyum ido nari wakamambrif;4 imboi rofyor wafrur roi vevyeva ido, sasarya isya isin au fa syun ro snembri. Sasarya ive daw ninyan au, imbape ivyekada swambrav fa pankarna.”

8Kain ikofen faro vedar vye Habel i, “Rwama kura ve yafe.”5 Surande ro yaf kwar ido, Kain iprer Habel i ma myun ra imar.6

9Manseren Allah ifuken faro Kain i, “Vedar bani Habel i ryoiso?”

Kain kyarem ve I, “Yafawi i va. Ayaiso vewaren warekinya?”

10Mura Manseren Allah ikofen ve i, “Rosai wafrur kwar ine? Vedar bani rik vyena nkanes nor Aya ro sapropya bori, raris mkarem ve fararyor insa vye vemunsu.7 11Rarirya wasmai fras inja nari wafararur ro saprop anine werva. Rik vedar bani vyena nasyun saprop inekwar, saprop ine vyas svari fa iser rik vedar bedi vyanna fafisu mun inya. 12Rofyor wamom ma kwaker, sapropya nari vyuk royova; nari wabur wadawai farma mura muma raris snonkaku vena supva.”

13Mura Kain ikofen faro Manseren Allah I, “Munsu ine myarvak mankenem, yasambrav fa yavar iva, 14Wayau aya bur saprop ine, yavinkwan bur varpon Vedi. Nari yambran yadawai farma mura muma imnis snonkaku vena mov va ro supswan ine bori, mansei vesrow ayansyanido nari smun aya.”

15Imbape Manseren Allah ikofen faro i, “Orova veri! Oso myun au ido, nari wasmai munsu, snonkaku ri fik.” Insape Manseren Allah ryir kakopya ro Kain i insa mansei vesrow kuker insya, smun awer i. 16Mura Kain rya ibur mov dakawos Manseren i ro anya, ma kyain ro sup Nod,8 ro Eden var wamuremya.

Kain romawa ma up vyesi

17Kain ma swari sukapar romawa snonya ma sunir i ve Henokh. Posa ido Kain vyawes kota oso ma nyir i raris snonsnon romawa vyani, 18Henokh ikapar Irad. Irad ikapar Mehuyael. Mehuyael ikapar Metusael, ma Metusael irya Lamekh kmari. 19Lamekh vyuk vin ri suru, susoine Ada ma Sila 20Ada ikapar Yabal, ma Yabal up vyesya siso vefaduru rofanfan ma siso vefrur soyai fa svarek ro. 21Veknik vyedi snori Yubal, ma up vyesya siso befnak nebi ma vewuf sonker. 22Sila ikapar Tubal Kain, ma up vyesya siso eve kamasan vekam rosaser ma romamun9 ro kansai ma mankarmomen. Tubal Kain srar vyedi snori Naama.

23Lamekh ikofen faro swa vyansuya:

“Ada ma Sila, murower:

ne, Lamekh swa vyena mu, murower muma ve wos ayenane:

Yamun snon oser kwar snar imer par aya,

yamun romawa babo anya snar iprer aya ra yafarvyar-vyar;

24snar rofyor Kain vye vemunsu rarwan ri fik ido,

Lamekh ima rarwan samfur di fik seser di fik.”

Set ma Enos

25Adam kuker swari sukapar romawa snon oser wer. Hawa ikofen, “Allah vyuk ve aya romawa snonya wer fa fyadwer Habel, Kain myun kwar ani.” Rarirya nyir i ve Set.10 26Set ikapar romawa snonya nyir i ve Enos. Fafisu anya iso snonkakusya sve randak samsom sena faro Manseren Allah I.