Alkitab Bahasa Biak

Sarmur 2

Rarirya Allah ifrur nanki ma supswan ine ma roi vebor vero dori nakam fa namawes. Ro ras eve fikya Allah fararur Vyena ne posakam kwar, inja Imnaisu.1 Mura Vye vok ras eve fik anya ma Fyasreni. Ro ras anya Allah Imnaisu snar fararur Vyanna namaweskam kwar.2 Irya fawar vekur supswan ine fafisu vye vesarmur.

Yaf Eden ma Snonkaku randakya

Fafisu Manseren Allah ifrur supswan ine, rokaker mor ma rokaker vese nakpis ma nasur vaim snar Manseren Allah isabu mekemya vaim ma snonkaku sisya fa som sker sapropya vaim. Imbape war na nakavavyai ro sapropya dori ma nfamasi supya bori.

Fafisu anya Manseren Allah dun saprop kerna, insape doferna fa nve snonkaku,3 raimnai Iwuf svayoi vevuk kankenem ro snonisi; mura snonkaku anya ikenem.4

Insape Manseren Allah ifrur yafya ro Eden var wamuremya, ma Ryir snon Ifrurkwar anya fa ryo yaf ani. Manseren Allah vyuk sur aiknam syoso ve syoso vepyum kaku, vemarem ma vevuk bon vepyum ma veyan kir kaku. Aiknam ri suru susur kako ro yaf anya faduri, susoine aiknam vevuk kankenem, ma aiknam vevuk fawawi vekur roi vepyum ma roi vevyeva.5 6

Marei veba oso idaf ro Eden, fa ifamasi yaf anya; ma ro Eden vandiri marei veba anya pyandwas ra vye snau ri fyak. Veponya snori Pison; war snaw anine idaf yar sup Hawila. Mov anya iser brawen vekakur ma damar papoi vespum ma karui7 eve maija. War snau eve suruya snori Gihon; war anya idaf yar sup Kus.8 War snau eve kyorya snori Tigris. War anya idaf ro sup Asyur var wamuremya. War snau eve fyakya snori Efrat.

Insape Manseren Allah ryir snon anya fa ryo yaf Eden insa ifararur ma fyaduru yaf anya. Manseren Allah ikofen faro snon ani, “Yavuk fa wan aibon ro aiknam vebor vero yaf ine, imbape aiknam fawawi vekur roi vepyum ma roi vevyeva, wan awer bon vyedi, snar rofyor wan i, nari wamar veri ro ras anya kako.”

Insape Manseren Allah ikofen, “Ipyum ba veri fa snon ine ikenem ro mankundi. Ivye Yafrur snonkaku oso vemnis kuker i fa isaramper i.” Mura Manseren Allah dun saprop ker na fa dofer na farari aiwan vero saprop yabo ma vero farsyos. Insape Dun si faro snon ani insa myam bo vyuk snonsnon ve si. Irya randak kaku aiwan ansya sismai snonsnon. Rarirya snon anya vyuk snonsnon faro aiwan vebor vero sapropya bo ma vero farsyos ansi. Imbape ro fandu aiwan ansi, oso imnis fa vye kari ma isaramper i va.

Mura Manseren Allah ifrurfa snon anya denef moser kaku, rofyor denef kaker, Manseren Allah dun kor oser ro dar vyesi, insape dofer epen swaf anya kuker krafna. Ro dar kor anya Manseren Allah ifrur vin oso, raimnai Dun i faro snon ani. Mura snon ani ikofen,

“Ine irya, min vemnis kuker aya --

Kor vyesya irya kor ayesi, ma kraf vyena irya kraf ayena.

Yaniri ve vine, snar vye veyun ro snon.”9

Evedar snonya nari ibur kmari ma snari su ma vye oser kuker swari, isof suve kraf oser.10

Snon ma vin ansuya suvaver, imboi supok sumaiva.

Source notes (10)

Cross-reference Ibr. 4:4, 10
Cross-reference Kel. 20:11
Footnote saprop ... snonkaku. Wos “snonkaku” ma “saprop” ro wos Ibraniya surok ra mov oser.
Cross-reference 1Kor. 15:45
Footnote aiknam vevuk fawawi vekur roi vepyum ma roi vevyeva orovaido fawawi vekur roi vebor kam.
Cross-reference Why. 2:7, 22:2, 14
Footnote karui wos ebeseya isoine keru, koru, koryui.
Footnote Kus: (Ro Padan-Aram); rovaido Sudan.
Footnote Ro wos Ibraniya wos vekur Snon ido ISH, ma wos vekur vin ido ISHA.
Cross-reference Mat. 19:5; Mrk. 10:7-8; 1Kor. 6:16; Ef. 5:31

Alkitab Bahasa Biak. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.