Sarmur 1

Allah Ifrur Nanki ma supswan ine

1Ro randakya, fafisu Allah Syarmur nanki ma supswan ine,12 2supswan ine imawes vaim ma syampurnak kaker. Sorenya irvaren ma ikawef roi vebor kam ro pampan veba kakuya dori, imbape Rur Allah iswor farma ro warya bori.3 3Allah Ikofen, “Ivyekada sananaiya isya!” Rarirya sananaiya isya.4 4Allah Myam sananai anya ipyum, muraido Pyandwas sananaiya bur pampanya, 5ma Allah Nyir sananaiya ve “Isnai” ma pampanya ido “Rov.” Rovya dande, vo arwo. Irya ras randakya.

6-7Ro ras eve suruya, Allah Ikofen, “Ivyekada farsyos sansoren isya fa iyarwarek ma pyandwas warya fa ivesisye ro mov ri suru.” Muraido roi evesya anya ryadirya. Rarirya Allah Ifrur farsyosya fa pyandwas war vero farsyos anya bori bur war vero bavdinya.5 8Farsyos sansoren anya Allah Nyir ive “Mandep.” Rovya dande vo arwo. Irya ras eve suru.

9Posa Allah Ikofen, “Ivyekada war vero nankya bavdi naryur ro mov oser, isof sapropya iprese.” Muraido roi evesya anya ryadirya. 10Allah Nyir vesyorya ve “Sup,” ma war veryur anna Dapna ve “Soren.” Allah Myam nakam napyum. 11Allah ikofen wer, “Ivyekada rokaker veborno nasur ro sapropya bori, isoine rokaker syos eve mor ma rokaker syos eve bon.” Mura ido roi evesya anna nradirya. 12Rarirya sapropya isasyar rokaker vebor vesur veve mor ma ai vemarem eve bon raris syos vyena oser-oser. Allah Myam na Imarisen. 13Rovya dande vo arwo. Irya ras eve kyor.

14-15Posa Allah Dawos wer, “Ivyekada roi vesnai ro farsyos sansoren naisya fa nasnai ser supswan, infa npandwas isnaiya bur rovya, ma ne avyair vekur fasna ras ma pasivarekna, ma fararwe fafisu.”6 Mura roi evesya anna nradirya. 16Rarirya Allah Ifrur roi vesnai veba ri suru, susoine ori fa isnai ro meserya, ma paeki fa isnai ro rovya; vese wer ido Ifrur maksya. 17Allah Vye orya, paeki ma maksya ro farsyos sansoren fa sisnaiser supswanya, 18insa sisnai ro meserya ma rovya, ma insa pyandwas sananaiya bur pampanya. Allah myam nakam napyum. 19Rovya dande vo arwo. Irya ras eve fyak.

20Posa Allah Dawos wer, “Ivyekada aiwan vekenem sibor kaku syos ve syos sisya fa sikenem ro warya do, ma mansya sibor sirov ro farsyos.” 21Posa Allah Ifrur aiwan soren veba kakusya, ma aiwan vebor syos ve syos vekenem ro warya dori, ma mansya syoso ve syoso. Allah Myam nakam napyum. 22Allah Vyevok nakam ma Vyuk sasoser faro aiwan vekenem ro warya dori insa sikapar siryewen sfamok sorenya, ma faro mansya insa sibor siryewen. 23Rovya dande vo arwo. Irya ras eve rim.

24Posa Allah Dawos wer, “Ivyekada aiwan veborno sisya ro supswan ine bori, aiwan vefafir ma verafdi, aiwan veba ma kasun.” Inja nakam nradirya. 25Rarirya Allah ifrur nakam ma Myamna vo Imarisen.

26Posa Allah Dawos wer, “Ivyekada Kofrur snonkaku fa imnis farari kuker Ko. Insa ikifepen in vebor vero soren, man vero farsyos, ma aiwan vese syakam, vefafir ma verafdi,7 veba ma kasun.”8 27Rarirya Allah Ifrur snonkaku, Ifrur fa imnis farari Mankundi. Ifrur snon ma vin.910 28Raimnai Allah Vyevok su ma Ikofen “Mukapar fa muryewen, insa up muvesi sfamok ro supswan ine fa sikenem ma siwaren warek i. Yavuk fa mufaduru ma muwaren warek in vero soren ma man vero farsyos, ma aiwan vesesya. 29Mumame, nanan Yavuk ve mu nasoine rokaker veve mor ma aibon. 30Imboi faro mansya kam ma aiwan vekenem ro supswan inensya, Yavuk nanan ve si ro avris ma rokaker ram berumek.” Inja nakam nradirya. 31Allah Myam roi vebor Ifrurkwar anna kam, ma imarisen kaku. Rovya dande vo arwo. Irya ras eve wonem.