Sarmur 26

Ishak Vyarek ro Gerar

1Fafisu Ishak isya syoyai kaker fanam war veyer Lahai-Roi, basbiser vebaya myun ro sup anya imnis raris basbiser veba vemun ro fafisu Abraham ikenem kaker aniwara. Inja Ishak ryave Gerar, ve Abimelekh, wairek Filistin, ma dor fa kyain ve mandaman ro diya. 2Inja Manseren Allah fyasnai Mankundi faro i ma Ikofen, “Rwa ve Mesir awer; barek monda kwar ro sup nari Yakur fasnai faro au. 3Barek ro sup ine kwar ve mandaman, rarirya nari Yakadaun ma Yave vok au. Sup mnuk ine kasiper nari Yavuki ve au ma kpu besya. Nari Yave imnis sowar Yavuk kwar faro Abraham kma bani. 4Nari Yavuk fa kpu besya sibor simnis mak vero nank iyaswa, ma sup mnuk ine kasiper nari Yavuki faro si. Er vebor vero supswan ine sya nari sor ve Aya insa Yave vok si raris mov Yave vok kpu besya raya.1 5Nari Yave vok au, snar Abraham iso asuser ma fyaduru sasoser ma parensa Ayena.”

6Inja Ishak vyarek ro Gerar. 7Fafisu snonkaku vero diyansya sifuken ve i vo sove Ribka inido, Ishak kyarem ve si vo dove Ribka inido srar vyediri, imboi swa vyedisyava. Ishak imkak warek snonkaku ansya smun i vo sun Ribka indi, snar ipyum fafayava.2 8Ishak vyarek ro mov anya ra fafisu ri veso nawas ido, ras oso wairek Abimelekh ikirwai ro varareya, ma myam Ishak isya ryafnak kuker Ribka i. 9Mura dor Ishak i ma ikofen ve i, “Vin aniya swa bedirya ke? Rosai evedar wove srar bedirya ni?”

Ishak kyarem be i vo dove, “Yakara vo yove na mkomun aya snar yakofen vo yove swa ayediri.”

10Imbape Abimelekh ikofen ve i, “Rosai evedar wafrur ra dine yov inko? Snon oso ro kawasa ayesine nari denef kuker swambri ido, auso nari vekamar sasar nkofrur ineni.” 11Insape Abimelekh vyuk sasoser faro kawasa vyesi radine, “Mansei vefrur mnisva yov snonkaku ine rova swari, nari vye vemun ra imar.”

12Ishak ifrur yaf ro saprop kyain ro anya, ma ro pasivarek anya ismai kraf ro yaf vyanna apaper rarwan usin oser, snar Manseren Allah vye vok i. 13Nana vyena nfanfanfon isof nyana fafayava. 14Snonkaku Filistin sya sisnesna namarisen i va snar nya manfamyan, domba ma sapi sibor kaku. 15Mura skuvepen war veyer vebor manfamyan Abraham vyesi svai ro fafisu Abraham ikenem kaker iwara.

16Mura Abimelekh ikofen ve Ishak i, “Rwa wabur sup inkovedi. Snar fafis ine wasmai papoik veba syadi ro inko.” 17Inja Ishak isasyar ibur ma syoyai ro dwas Gerar. Fafisu ri fumo vyarek ro diya. 18Insape vyai kaver war veyer svai kwar ro fafisu Abraham i ma kawasa Filistin sya skuv epen kuker saprop anna. Vyuk snonsnon ro war veyer anna raris snonsnon kmar Abraham vyuk vepon kwar anna.

19Manfamyan Ishak vyesya ser war veyer ro dwas Gerar ma sisrow war nabor kaku. 20Imbape manfarandous ro Gerar sfanvavri kuker manfarandous Ishak vyesya. Sawos vo sove, “war ine war nkovedirya.” Mura ido, Ishak nyir war anya ve war “sfanvavri.”

21Manfamyan Ishak vyansya ser war veyer oso wer, imbape sfanvavri kuker war veyer anya wer. Rarirya Ishak nyir war anya ve “mbrov yaye.” 22Ramnai ido, Ishak ibur mov anya ma vyai war veyer veve kyorya. Fafisu anya mbrovo wer va. Rarirya Ishak nyir war anya ve “Rehobot” Isoine “Vave mkei.” Ikofen, “Kur ine Manseren Allah vyuk ve ko fa kokain ro saprop ine, ma na kokenem kuker aski ma payamyum ro dine.”

23Posa Ishak isasyar ma rya ro Bersyeba. 24Ro mun rovya Manseren Allah fyasnai mankundi faro Ishak ma ikofen, “Ayaine kmam Abraham Allah vyedi. Wamkak awer, Yafaduru au, nari Yave vok au ma Yavuk ve au kpu sibor kaku snar fes eren Ayedi faro manfamyan ayedi Abraham i.” 25Ishak vyaus apen farsarser fa vyuki syom Manseren Allah I ro mov ani. Ishak vye ryar ro diya ma manfamyan vyan sya ser war veyer ono wer.

Fes eren fandu Ishak ma Abimelekh

26Ras oso Abimelekh ryaker Gerar, kuker Ahusat, man wawos vyedi, ma Pikhol mambri ro snon mamun vyesi, fa sisrou kuker Ishak i.3

27Mura Ishak ifuken, “Rosai evedar fafis ine mkorama mkosrou kuker ayanya? Fafisu aniyafa mkove mbrov ma mkoyau aya bur sup mkovani?”

28Inja skokarem, “Kur ine nkofawi kaku Manseren Allah fyadiren au inja nkokara fa ipyum syadi kofes eren. Fores ve inko 29nari wafrur roi vevyeva yov inkova, rarirya kako nko kako nari nkofrur roi vevyeva faro auva. Rari inkovena napyum yov au inja nkorir fa wabur kuker aski. Inja nkofawi kaku Manseren Allah vye vok au.” 30Insape Ishak fyasos anan ma aninem na fa vyuki fyansi. 31Meser ndamyasi mun arwoya ido sfes eren kuker sowar. Snar sve manivov kwar, mura Ishak ikofen marandan vevye ve si ma sibur vesisye.

32Ro ras anya kako manfamyan Ishak vyansi srama sikofen vadir ve i war veyer skovai kwar anya. Skove, “nkosmai warya kwar.” 33Mura Ishak nyir war veyer anya ve “Syeba.” Irya randak kaku kota anya snir ive Bersyeba.4

Esau swa vyesya ro er vese

34Fafisu Esau ras kenem vyedi vye pasivarek samfur di fyak, fyarvuk kuker vinkbor ri suru ro er Het, susoine Beri inai vye Yudit i ma Elon inai vye Basmat i. 35Vin ansuine sufrur sne fafardun kaku Ishak ma Ribka su.