Sarmur 25

Abraham up vyesi ro swa vye Ketura

1Abraham vyuk vin oso-wer snoriso Ketura. 2Swa vyanine ikapar romawasya ve i siso ine: Simran, Yoksan, Medan, Midian, Isyibak, ma Suah. 3Yoksan dakkapar Syeba i ma Dedan ma kpu Dedan vyesiso kawasa Asyur, kawasa Lethus, ma kawasa Leum ansi. 4Romawa Midian vyesiso ine Efa, Efer, Henokh, Abida, ma Eldaa. Sine kam Ketura kpu vye si rya.

5Abraham vyuk nana vyena kam faro Ishak i, 6Fafisu ivye kaker kya vyesi romawa se si kako saksmai rarwas. Insape iwan si fa sibur ve sup Kanaan var wamuremya, insamaido svinkwan bur romawa vye Ishak i.

Abraham imar ma sikriri

7-8Abraham imar ro fafis ras kenem vyedi vye pasibarek usin oser samfur di fik seser di rim. 9Romawa vyansuya isoine Ishak ma Ismael sukrir i ro avyav Makhpela vero var wamurem Mamre. Kur iwara saprop mnuk Efron, rumkun Sohar, up Het vyedi. 10Imboi Abraham kyoves i kwar fa sikrir insar swar Sara i ro.1 11Posa ro Abraham marmar vyedi, Allah vye vok romawa vyedi Ishak. Fafis anya Ishak vyarek fanam be war veyer, “Lahai-Roi” sap kako ve, “I vefaduru Aya.”

Ismael up vyesi

12Ismael inido Abraham ma Hagar vin Mesir anya romawa suvediri, Hagar inido Sara infyan vyedirya. 13-16Ismael ismai romawa samfur seser disuru se-veyap raris vave mambekanaek sedi, sisoine: Nebayot, Kedar, Adbeel, Mibsan, Misyma, Duma, Masa, Hadad, Tema, Yetur, Nafis ma Kedma. Romawa sine siso eve up faro er veba samfur seser disuru, rarirya mnu, ma soyai sena sap na raris snonsnon sena. 17Ras kenem Ismael vyena ne pasibarek usin oser samfur dikyor seser difik insape imar. 18kpu vyesya svarek ro fandu Hawila ma Syur ro var wamurem vekar ve Asyur. Sikenem vese bur kpu min vese Abraham vyesi.

Esau ma Yakub suve veyaven

19Ine kada fawar vevadir Ishak, Abraham romawa vyani. 20Ishak ikenem pasivarek samfur di fyak fafisu fyarvuk kuker Ribka, Laban srar kasun vyedi, Betuel romawa vyanya, snonkaku Aram veraker Padan-Aram.

21Ishak vyenadi dor faro Manseren Allah I, snar swar Ribka nya romawa va. RariryaManseren Allah imnaf Ishak nadi vyedi, inja Ribka fyadores. 22Ribka fyadores romawa vesaper, ma vepon ro romawa ansuya daven su vaim, romawa ansuya sufanfavri ro kaparya dori. Ribka ikofen, “Rosai vefnaifa yave radinenya?” Posa dor fasasnai ro Manseren Allah I.

23Manseren Allah dawos faro Ribka i,

“Er di suru suisya ro kapar bedi;

nari waven er ri suru eve mrov yaye;

veknikya syambrav syadi vedar ebaya ma

vedar ebaya nari vye manfyan faro kasunya.”

24Fafisuya imnis kwar fa Ribka ive daven romawa, inja Ribka daven romawa snon vesaper ri suru. 25Romawa rakya syamyar, ma kif vyeja imnis syatu eve bur-bur. Ryani romawa anya nyir ve Esau.2 26Fafisu Ribka daven romawa eve suruya, vramin vyeja iser epen Esau wekuver vyedi. Inja nyir ive Yakub.3 Ishak ras kenem vyeja pasivarek samfur di wonem ro fafisu romawa ansuya suve veyaven.

Esau vyov nasan romawa rak vyedi

27Romawa ansuya susur suba. Esau vye mansamnaf veve kir kaku ma imarisen ikenem ro maper, imboi Yakub iknon ma imarisen syadi kyain ro rum. 28Ishak iswar syadi Esau i, snar Ishak imarisen dan aiwan kraf Esau myun sya. Imboi Ribka i iswar syadi faro Yakub i.

29Ras oso fafisu Yakub ifnav avrui verik sya, fyoro va ido Esau syamnaf ra ibur. Ibiser bos kaku. 30Ikofen faro Yakub i, “Yabiser kaku. Yor avrui verik siya kermkun no.” Efnai vedar fa Esau sor i ve Edom.4

31Yakub kyarem ve i “Ipyum, imboi buk nasan romawa rak banya ve aya.”

32Esau ikofen, “Fanduno ro nasan romawa rakya ve ayava. Ine yabiser bos kaku!”

33Yakub ikofen wer, “Fores vepon ve aya, na buk nasan romawa rak banya ve aya.”

Esau fyores ma vyuk nasan vyanya faro Yakub i.5 34Posa ro diya Yakub vyuk mamami ma avrui verik ansi. Esau dan ma dinem ra posa rya ibur. Rarirya Esau kyor wef nasan vave romawa rak vyedi.