Sarmur 24

Ribka vyevefuken faro Ishak

1Abraham vye mansar bos kaku, ma Manseren Allah vye vok i ro roi vebor kam. 2Ras oso Abraham dawos faro manfamyan randak ikyar kaku, vemamwarek ma vefaduru nana vebor vyenakam, “Rwir vramin besuya ro weswaf ayesuine.1 3Fores ve aya, kuker snonsnon Manseren Allah, veve knam papoikya ro nanki ma sup swan ine, nari wapok sweref vino ve romawa ayedi Ishak i ro fandu snonkaku Kanaan sineva. 4Imboi kwaver ve sup marin ayedi ma swewar vino ro fandu kawasa ayesi.”

5Mura Manfamyan ani ifuken yov Abraham i, “Rariso, inai inkbor anya imewer iso aya ve dine ido? Nari yun romawa sinan banine ve sup marin baniwa ke?”

6Abraham kyarem, “Waswarepen kaku! Wapok wun romawa ayanine mura vaveri!” 7Manseren Allah, Allah veveknam papoik ro nanki, Dun aya kwar fa yasasyar bur rum kamam vyedi ma sup naek srar ayesi, ma Fyores ve aya kwar fa nari Vyuk sup ine faro up ayesi. Inja nari iwan manakya Vyesi fa sifnovek au, insa wasmai vino ro diwa ve romawa ayedi. 8Imboi inai inkbor anya imewer iso au ido, sowar ine inyanem au va. Rariryano wapok wun romawa ayanine mura va. 9Romura manfamyan ani ryir vramin vyesu ro Abraham weswaf vyesuya ma fyores fa nari ifrur raris Abraham wawos vyena faro i.

10Mamfamyan ani dun unta samfur warpu arasai vefarawriwek. Imbran ve kota mov ras nawara Nahor ikenem ro, kota anine ryo var wambrur Padan-Aram. 11Ryaro mov anya kwar ido, vye unta ansyafa simnaisu fanam war veyer ro kotaya vandiri. Mandira kwar, irya fafisu var vin sya srama ro war veyer anya fa spos ware. 12Mura manfyan ani vyenadi, “Manseren Allah, Allah amber ayedi Abraham, wafnovek aya, insa fararur ayedine imawes ro ras ine, Fasnai syowi saswar Bena faro amber ayedi Abraham i. 13Mam mufres, yores ro ris war veyer ine. Kero nari inai vinkbor vero kota ine srama spos ware. 14Nari yawos faro vinkbor ansya oso radine, ‘Wafnovek aya, wasabu rosaser veyun war bediya ma buk warkeno ma yinem,’ Rao kyarem vo dove, ‘Winem mura kwar ma unta kamam besineno, nari yavuk kako vesi fa sakinem’ irya vin Manseren Allah kwinfir faro manfamyan bedi Ishak. Ryadirya kaku ido, irya yafawi kaku Manseren Allah fasnai frur pyum Bedi faro amber ayedi Abraham.”

15-16Fafisu vye nadi anya, Ribka, inai vinkbor bepduk kaku ma snono ikyaren i vaim, ryama ro war veyer anya, dun rosaser veser warya ro erdai vyedi. Betuel inai vyediri, ma Betuel sinan vyesuiso Nahor ma Milka; Nahor inido Abraham vedar vyedirya. Ribka imbran yov war veyer anya, ma iser rosaser vyani, ma imbran kaver. 17Abraham manfamyan vyanya ifrar fa fyanam i, ma ikofen faro i, “Insos wafnovek aya, buk fa yinem ro rosaser wun iya.”

18Vinkbor anya kyarem, “Kamam, Winem,” posa inai anya isabu rosaser dun anya ma ikif epen vo manfamyan anya dinem. 19Manfamyan anya dinem ra posa; vinkbor anya dawos faro i, “Nari yapos war no ve kamam unta-unta bansine kako, insa rofanfan ansiya sakinem ra sisyopen kaku.” 20Raimnaido fasaudam monda war vero rosaser anya isbaweri ro rosaser beser war unta ansya sinem roya, ramnai ifrar kaver wer ve war veyer anya fa pyos war nara nabor syadi wer isof rofanfan ansya sinem rawo sisyopen kaku. 21Fafisuya manfamyan Abraham vyanya dawos wos kermkunno vaveri imbo myampum monda. Manfamyan anya ive ifawi kaku Manseren Allah vyuk fa fararur vyeja imbran pyum ke orova.

22Unta ansya sinem war anna ra sisyopen kaku, insape manfamyan Abraham vyanya dun afyamankor brawen vekakur kaku, ma syawersi ro vinkbor anya snonisi. Ma ro vrado vyeja pyanai sarak brawen ri suru. 23Posa manfamyan anya ikofen, “Indo wakofen vadir kmam snoriso. Mov anenefo isya ro rum byeja fa aya kuker snonkaku ayesine na nko veryar ro?”

24Vinkbor anya kyarem faro i, “Kamam snori Betuel i, Nahor ma Milka romawa suvediri.” 25“Ro rum inkoveja mov anenef naisya ve kamam au ma kako avris ma rovean rofanfan.”

26Mura manfamyan anya vyan suba ve Manseren Allah I. 27Ma ikofen, “Sanandik ve Manseren Allah, Allah amber ayedi Abraham. Manseren Allah ve asuser ma wapyum fafayava faro amber ayedi Abraham i. Vefarkin pdef aya ve rum naek karyer vyesi.”

28Posa inai vinkbor anya ifrar ve rum ma ikofen vadir ve snari ma fyawar rosai isrow kwar anna. 29-30Ribka srar vyedi snori Laban i. Ryower fawar Ribka vyanya vekur manfamyan anya roi dawosna. Myam kako roi vefamankor ro snonisi ma samfar vero vrado srar vyani. Mura Laban syae fa ifrar ra isrow kuker manfamyan Abraham vyanya snar isya dores kaker kuker unta ansya fanam war veyer anya. 31Laban ikofen, “Kamam au snonkaku vesmai vok ro Manseren Allah I. Wores ro vandi awer. Rwama kora ve rum. Nkofasos simya kwar ve kamam au ma kako mov nanan faro unta-unta kamam bansine.”

32Posa manfamyan anya iso ma syun be rumya do. Laban isabu roi vebor unta ansya sun na, ma fyansi kuker avris ma rovean. Raimnaido dun war na fa Abraham manfamyan vyansya ma snonkaku veso insya svuki vyan wemin sena. 33Fafisu rovean na nfasos kwar, manfamyan anya ikofen, “Yapok yananva, vepon ro yavadir ananun yun na vaim.”

Mura Laban ikofen, “Indo wawos mura.”

34Insape Abraham manfamyan vyani ikofen, “Ayaine Abraham manfamyan vyedi. 35Manseren Allah vye vok kaku amber ayedi ma vyuk ve i nana vebor kaku. Manseren Allah vyuk kwar faro i domba, kambing, sapi, unta, keledai, ma kako sarak, brawen, warpu manfamyan ma infamyan. 36Ro ras kenem mun vave vinsarya, amber ayedi swa vye Sara, daven rumkun snon oso, ma amber ayani ryovor nana vebor vyannakam faro romawa vyani. 37Iwan fa yave syasi kuker fafores insa yuf nako sasoser vyena. Ikofen ra dine, ‘Wapok sweref vino ro fandu kankain sup Kanaan ine fa romawa ayani vyuk va, 38imboi sweref vino ro fandu naek-srar kamam vyesi. Inja rwamura fasaw veri.’ 39Mura yafuken faro I vo yove, ‘Imbo nari inai inkbor anya imewer iso ayanido, na rariso?’ 40Muraido kyarem, ‘Manseren Allah yaso asuser vesyakwar anya nari Iwan manakya Vyedi fa ifnovek au insa sasewar bedi vye fromova. Nari wasrow vino ve romawa ayedi ro fandu kawasa ayesi, isoine naek srar kamam vyesi. 41Wasmai kurpum ido, insape sowar anine inyanem au va.’

42Ma fafis ayaisya ro war veyer ani risya, yanadi ro sneri do vo yove, ‘Manseren Allah, amber ayedi Abraham Allah vyedi Au, ivyekada Manseren Allah buk fa sasewar ayedine imawes. 43Nari yores pdef ro war veyer ine risya, rawo inai inkboro ryama dun ware, ma nari yor yov i insa vyuk war keno ma yinem. 44Inja inai inkbor ani ifrur radirya ma vyuk aninem kako faro unta ayesine ido, inai inkbor Manseren Allah kyinfir fa nari amber ayedi Abraham romawa vyani nya ve swaya irya.’ 45Kur anya nadi famyun ro sneri do imnai vaim, Ribka ikamar rosaserya ro erdaiya ma ryama pyos ware ro war veyer ani. Mura yawos yov i, ‘Wafnovek aya fa buk war keno ma yinem.’ 46Fasaudam monda ryir rosaser anya vo ikofen, ‘Winem mura kwar, ma unta bansine kako nari yun war no fa sakinem.’ Rarirya yinem ma unta ayansya kako vye fa sakinem. 47Posa ido yafuken i, ‘Kmami nido mansei rya?’ Kyarem bo dove, ‘Kamami inido Betuel i, Nahor ma Milka romawa suvediri.’ Mura yun afyamankor brawen sya fa yasawer ro snonisi ma yapanai samfar suya ro vrado vyesuya. 48Yavan suba ma yasyom yasandik Manseren Allah, Abraham Allah vyedi. I vefarkin aya kwar ma ro dine, faro amber ayani kawasa vyesi isof yasmai inai vinkbor ine faro romawa vyedi. 49Inja fafis ine mkove syowi amber ayanya snar karyer mkovedirya ma mko ve imnis fandun vyeja ido, mkawos woso ve aya, mkomarisen orova vo mkomewer ido mkokofen isnai. Insa yafawi rosai ive yafrurya.”

50Laban ma Betuel sukarem, “Snar mnuk ine ryama ro Manseren Allah I, inja nkopok nkawos yaye va. 51Ribka isine; ivye iso sinan au mura kwar insa vye swa faro amber bani romawa vyedi; raris Manseren Allah mankundi dawos kwar.” 52Fafisu Abraham manfamyan vyanya ryower wawos sena, mura kyunem vyan suba ve Manseren Allah I. 53Ramnai ido isasyar sansun, famankor sarak ma brawen, ma vyuknakam faro Ribka i. Vyuk roi vekakur na ve srar vyeja ma snari kako.

54Posa rodiya, manfamyan Abraham vyanya ma snonkaku veso i ansya sanan sinem raimnaido senef ro diya. Arwo baboya, Abraham manfamyan vyanya ikofen, “Yor syowi ro mko vo mkorir fa yabur kaver ve amber ayani.”

55Imbape Ribka srar vyeja ma snari sukofen, “Ivye kada Ribka vyarek us inko ras samfur wer resari, posa ido insape rya mufa.”

56Manfamyan anya kyarem faro sko, “Mkokarwarek awer aya. Manseren Allah, ifrur fa maran ayedi ne imyone; mkorir fa yabur fasaw ve amber ayani.”

57Skawos faro i, “Rarirya ido kor Ribka i ma kofuken i.” 58Posa skor Ribka i ma skofuken i, “Wamarisen waso snonkaku ine?”

Mura Ribka kyarem, “Imbo yamarisen.”

59-60Rarirya skomarisen fa Ribka iso ma kako infamyan vefaduru i ro fafisu vye kapira, skoso manfamyan Abraham vyanya kuker snonkaku veso insya. Insape skove vok Ribka i kuker wos nane,

“Ribka, ivyekada nari wakapar ra kpu besya sve syaran-syaran!

Ivyekada kpu besya na simerkar kota-kota mbrov sesya sena!”

61Mura Ribka syanson kuker vinkbor veyuf farmyan insya, insape skek unta ma skora skoso Abraham manfamyan vyani.

62Fafisu anya kako Ishak ryaker2 sup ve ursva, dunuk ro war veyer sor ve Lahai-Roi ma syoyai ro Kanaan3 var wamiresya. 63Fafisu orya iwai murvav Ishak isasyar fa imbran ro maper, myam ido unta sya simbran muma. 64Fafisu Ribka myam Ishak i, mura isabu ro unta dekya, 65ma ifuken ve Abraham manfamyan vyani, dove, “Snon vembran ro maper iyama nido manseiri?”

Manfamyan ani kyarem ve i, “Amber ayedi irya.” Mura Ribka dun kruben kerya fa vyuki dwarek varpon vyedi.

66Insape manfamyan ani fyawar ve Ishak i roi vebor ifrur kwar anna. 67Posa rodiya Ishak dun Ribka i fa susun ro soyai snar Sara vyani, ma fyarvuk kuker Ribka i. Ishak iswar vye syowi Ribka i; mura sneri iprei snar iswar kaker sna vyedi vemar buri kwar ani.