Sarmur 23

Sara imar ma seraki

1Ras kenem Sara vyedi pasivarek usin oser samfur di suru seser di fik, 2insape imar ro Hebron ro sup Kanaan. Abraham myandak ma fyarswar marmar swar vyani.

3Raposa Abraham iyor ibur swa vye vemar kwar ani ma ryave kawasa Het vekaindo sup ani. Ma ikofen ve si, 4“Ayainema mandaman vekenem ro fandu naek ma srar mko, inja mko marisen ido yakoves saprop mnuko fa samaido yakrir swa ayanya ro.” 1

5Kawasa ansi skarem, 6“Nkosom au ve amber mananwir vesambrav ro fandu er ine, inja wakrir swambri ro rus nkovena mindisa vepyum syadi. Nkoinekam nkomarisen nkofasos ruso faro swa bani”

7Abraham kyunem ro varpon sena, 8ma ikofen, “Naek ayena mko, mkove yakrir swa ayanya ro dine ido, mkawos pyan ve Efron, Zohar romawa vyani, 9insa vyov ve aya avyav Makhpela vero ris yaf vyedi. Ipyum syadi vyov saprop anya ro dine, insama naek anmkoya mkofawi kame. Vavyakya na yavak sararir i insama saprop anya yana i.”

10Fafisu anya Efron isya kyain kuker kawasa Het sya ro mov farsaso ro kedwai veba ro kota ani. Insape snonkaku vebor ansyakam smam epen, Efron kyarem ve Abraham i, 11“Er ayedi smamepen, saprop ine ma avyav vyeja yavuki ve amber au insa wakrir swambri ro diya.”

12Mura Abraham kyunem ro varpon kawasa Het ansya, 13ma kawasa vebor ansya kam srower dawos yov Efron i radine, “Yor fa wamnaf ve aya. Yaswaruser fa ave yakoves saprop anya kasiper. Inja kwarem fararyor ayedine, insa yakrir swa ayanya ro mov ani.”

14Efron kyarem ve i, 15“Saprop mnuk eve kumpan sarak usin di fyak vye maeja mankenem ve ku va? Wakrir swambri ro mov anya kwar.” 16Abraham imarisen apap anya. Kyor barbor kumpan sarak Efron dap ansya, sarak utin di fyak, kumpan sarak sine marvakvakya simnis karkor snonkaku vefarvavyan ro fafisuya. Posa Abraham vyak faro Efron, ro varpon mamam kawasa Het ansya.

17Irya yaf Efron vyedi vero Makhpela ro var wamurem Mamre, Abraham nya vardi i. Saprop anya fnovek yaf ma avyav ma kako aiknam bero diyanna ma aiknam beyores ro was vyena. 18Saprop anya kawasa Het veyakrama ro sarawrow vero kedwai veba kota anya sya sifawi kam Abraham saprop vyediri.

19Posa rodiya Abraham ikrir swar Sara i ro avyav Makhpela ro sup Kanaan. 20Irya saprop ma avyav anya kawasa Het ansya svuki faro Abraham fa nya i ve saprop rus karamram.