Sarmur 18

Allah fyasnai Mankundi ve Abraham i ro Mamre

1Ras oso Manseren Allah fyasnai mankundi wer faro Abraham i ro soyai vyedi fanam aiknam tarbantin vero Mamre. Ro ras anya daresya iba marsir va. Abraham kyain ro kerwa soyai vyedi. 2Fafis ikpoi vruri, myam snon di kior skores ro varpon vyedi, Abraham iyor i ma isamberen fa isrow kuker sko. Kyunem ma1 3ikofen ve sko vo dove, “Amber anmkoya mkombran pdef bur awer soyai ayedine, ivyekada mkomnaisar insamaido yuf farmyan mko resari. 4Nari yun war keno ma vyan amber anmkoya mkowemna, inja mkorama mkokain mbruk ro ai fuar ine. 5insa yun anan ker no ma mkan fa nbuk sambrav ve mko fasamaido mkombran pdef marandan mkovedi. Amber anmkoya mkove syowi kaku aya, evedar mkomnai sar ro soyai ker ayedine ndi.”

Skokam skokarem be i vo skove, “Kasumasa ve au ro frur pyum bedi. Nari nkomnai sar.”

6Abraham syun sausau ve soyai vyani, ma ikofen faro Sara i, “Wun fasau tepung vepyum kaku, ma wofer na ra nompnir.” 7Insape ifrar fasau ve padwar rofanfan vyedi ma dun sapi kuv babo kraf vesvunek ma ve mafen, insape duni ma ve infamyan vyedi fa ikun fasau i. 8Posa ido Abraham dun sapi sus sya, sus mafen2 sya, ma sapi kraf vemas fyasos kwar ansya ro varpon dakam vyansi. Fafisu skokain skonan, Abraham mankundi duf farmyan sko ro ai fuar ani.

9Skonan ra posa skofuken, “Swambri Sara i ryoiso?”

Abraham kyarem ve sko vo dove, “Isya ro diwa, ro soyai iwa dori.”

10Snon oso ro fandu sko ikofen, “Fafis vera dine ro pasibarek babo nari yakaver. Ro fafisu anya swambri Sara inari daven romawa snono.”3

Fafis anya Sara isya ryower ro kedwai soyai anya varpurdi. 11Abraham kuker Sara su ve mansar vinsar kaku, inja Sara nari ikaparva. 12Inja Sara imbrif ro snerido ma ikofen, “Yave vinsar ma yamaryoi, swa ayanya no vye mansar kako, inja mov risai romawa veyun doryav marisen be ayanya yasmai i raya?”4

13Mura Manseren Allah ifuken ve Abraham i, “Rosai evedar Sara imbrif ma kyor wanan ro sneri, kakuke nari yakapar romawayo ro fafisu yave vinsar ine? 14Royo isyafa syamswen faro Manseren Allah iva? Raris insanja Yakofen kwar ani, fafis veradine nari Yakaver ve dine wer ma fafisu anya Sara nari daven romawa snono.”5

15Snar Sara imkake, inja iruken, dove, “Ayama yambrif va.”

Imbape Manseren Allah kyarem ve i, “Kaku, insanja wambrif.”

Abraham dor fakamaman faro Sodom

16Insape snon dakam anskoiya skombran wer ma Abraham imbran so sko. Skombran raro mov oso ma skores skomam ve Sodom. 17Manseren Allah ikofen ro sneri “Rosai Yave Yafrurya nari Yayofek na bur Abraham iva. 18Up vyesya nari sve er veba nari vekif vave sasoserya. Ro do i, er vebor vero supswan ine nari Yave vok si. 19Yakinfir i kwar fa fyarkin romawa vyesi ma kpu vyesi, insa sisoyuser Aya ma sifrur roi vebor vepyum ma venapes. Inja sifrur na ido, ananun vebor Ayena faro Abraham i nari yavuk na fa namawes.”

20Romura Manseren Allah ikofen faro Abraham i, “Yamnaf fawar vevyeva vemarvak vekur Sodom ma Gomora, ma kakuveri varvor Sasar sena nabor naba kaku. 21Rarirya nari yasabu mura ve si, fa Yamam fanfaya vebor Yamnaf nane nkakuke orova.”

22Muraido snon di suru ro fandu snon eve dakam anskoiya, sumbran ve Sodom, imbape Manseren Allah isya dores kaker kuker Abraham i. 23Abraham isnefer Manseren Allah I ma ifuken, “Kaku Manseren Allah nari ve ninyan snon kaku vekenem pyum sya fa siwarpu snonkaku vesasar sya? 24Imboi snon kaku samfur di rim vesasar va sisya ro kota anya ido, nari Manseren Allah beninyan kota anya? Ivyeido Fakman kota ani, insa snonkaku ansine simar awer. 25Sye Manseren Allah rariryanawer! Imbude snonkaku vesasar va sya simar warpu vesasar sya ndi? Snar Manseren Allah wafrur ra dirya nido, snonkaku vesasar va sya nari se eve ninyan warpu snonkaku vesasar si. Au monda Mankakara faro kawasa ro sup swan. Inja, nari ve Mankara si kuker nanapes!”

26Manseren Allah kyarem, “Imbo snonkaku samfur di rim vekenem pyumno sisya ro Sodom ido, nari yavuk fakamaman faro kotaya vesiper snar snonkaku ansine.”

27Abraham ikofen wer, “Manseren Allah fakman aya ro wos vesyadadi nane. Ayaine snonkaku monda, yasmai papoikova fa yavuk dawawos yov Au. 28Imbape, snonkaku samfur di fyak seser di rim monda ryarpon do samfur di rim yava, nari Manseren Allah farmun kota anya?”

Manseren Allah kyarem vo dove, “Yasrow snonkaku ri samfur di fyak seser di rim vekakusya ido, nari yafarmun kota anyava?”

29Abraham ifuken wer, “Rariso snonkaku samfur di fyak monda ido?”

Manseren Allah kyarem ve i, “Snar snonkaku samfur di fyak ansya svedar yambrer au Ayena.”

30Abraham ikofen wer, “Manseren Allah wamsor awer aya imbe yave yafuken wer. Rariso snonkaku samfur di kyor monda ido?”

Kyarem vo dove, “Yasrow snonkaku samfur di kyor monda ido, nari yambrer swaruser Ayena”

31Abraham ifuken wer, “Buk fakman ve aya ro wos syadadi ayena insa yawos pdef wawos ayena, Manseren Allah ivye snon kaku samfur di suru monda ido?”

Manseren Allah kyarem, “Yasrow snon kaku samfur di suruyo ido, kota iwa nari yafarmun iva.”

32Papupesya Abraham ikofen wer, “Wamsor awer aya Manseren Allah, yafuken monda ve rarwan osero wer. Snonkaku samfur monda ido, rariso?”

Manseren Allah kyarem ve i, “Snonkaku samfur monda i vesasarvaya ido, nari Yafarmun kota anyava.” 33RariryaManseren Allah dawawos kuker Abraham i ra posa, insape Ramura, ma Abraham i kako ibur ve soyai vyedi.