Sarmur 17

Sunat vye avyair fasfes-eren Allah kuker Abraham

1Fafisu ras kenem Abram vyedi vye pasibarek samfur di siw seser di siw, Manseren Allah fyasna mankundi ma Ikofen ve i vo dove, “Ayaine kada Allah veve knam Papoikya. Waso user Aya ma wafrur marisen Ayena vesya kwar. 2Nari Yafes eren kuker au ma Yavuk romawa ma kpu besya ra sibor rape.” 3Inja Abram vyan suba faro I, insape Allah Dawos wer, 4-5“Ine irya fes eren Ayedi kuker au: Yavuk anun faro au snar au irya up ro er vebor syakam. Rarirya snombri nari sap ive Abram werva imboi sap i ve Abraham.12 6Nari Yavuk ve au romawa inai sibor kaku, ma rofandu si nari ono sve wairek. Kpu besya sibor fafayava, isofro nari sve er vebor veba.

7Nari yave asuser eren Ayedi faro au ma kpu besya, syos ve syos, ma fes eren ine kyain fioro bis. Ayaine yave Allah ve au ma Allah ve kpu besya.3 8Nari Yavuk ve au ma kpu besya, saprop kurine wakenem ve mandaman ro ine. Saprop Kanaan kasiper nari vye sup marin ve romawa kpu besya isof fioro ma nari sisyom monda faro Aya.”4

9Allah dawos wer ve Abraham i, “Au kako ivye waserepen nako faro fes eren ine, au ma kpu besya syoso ve syoso. 10Au ma kpu besya snon sya ivye sve sunatsi.5 11-12Randak ro kurine nari be sunat romawa kapira snon eve ras ri war, kako manfamyan sikapar ro rum bedi dori rovaido manfamyan kwoves si. Sunat anine nari vye avyair fes eren Ayedi kuker au. 13Snon syakam sismai sunat. Ine nari vye avyair vefasnai vadir fes eren Ayeja kuker au kyain fyoro bis. 14Snon eve sunatva sya, saksun karkor ro kawasa ayesyava snar sveyuk fes eren ani.”

15Posa Allah Ikofen faro Abraham i, “Nari wap swambri snonsnonya ve Sarai werva; imboi randak ro ras ine nari wap ive Sara. 16Nari yave vok Sara i. Nari Yavuk fa daven romawa snono ve au. Kaku, nari Yave vok Sara i, ma nari vye up faro er vebor. Ro fandu kpu vyansine nari ono sve wairek.”

17Inja Abraham kyankunem, imbrif ma kyara fasis ro sneri, “Ras mundiri snon eve mansar bos kaku yaine nari yasmai romawayo raya? Ma Sara ikako vye pasivarek samfur di siw kwar inja nari ikapar?” 18Mura ikofen faro Allah i, “Ipyum syadi Ismael i eve knam nana ayanna-ni.”

19Imbape Allah Ikofen, “Orova. Swambri Sara i nari daven romawa snono ma nari nwir i ve Ishak.6 Nari yave asuser fes eren Ayedi kuker romawa ani ma kuker kpu vyesya isof fioro bis. Fes eren anya kyain fyoro bis. 20Faro Ismael i, Yamnaf fararyor beja kwar; nari Yave vok i, ma Yavuk fa ikapar iryewen rao sibor kaku; nari ikapar wairek samfur seser di suru, ma nari Yafrur fa vye er veba kaku. 21Imbape fes eren Ayedine nari yafesi kuker Isak, romawa karyer bani, nari Sara daven i ro pasibarek babo, imnis fafisu veradine.” 22Allah dawos ra posa, ibur Abraham i.

23Abraham isoyuser Allah ananun vyeja, inja ro ras anya veri vye sunat romawa vye Ismael i ma snon vebor vero rumya dorisya kame, ma manfyan sikapar ro rum vyeja warpu manfyan kyoves sya. 24Abraham ras kenem vyedi, vye pasivarek samfur di siw seser di siw, fafisu sesunat i 25ma romawa vye Ismael i, vye pasivarek samfur seser di kyor. 26Sikame sve sunat ro ras oser, 27fnovek manfyan Abraham vyesya kame.