Sarmur 16

Hagar ma Ismael

1Abram swa vye Sarai, ismai romawayova kaker. Imboi ismai vinfyan vin Mesir oso, inkbor ani snoriso Hagar. 2Sarai ikofen faro Abram i vo dove, “Manseren Allah vyuk fa yakaparva. Rarirya ipyum syadi wenef kuker vinfyan ayanine imbude iso nari vekapar romawayo ve ayanya ndi.” Abram vyuk kaku ro Sarai swaruser vyanine. 3Rarirya Sarai dun Hagar i fa Abram nya ve swa. Kur anya Abram ikenem ro sup Kanaan pasivarek samfur kwar. 4Abram denef kuker Hagar i, inja vin anya fyadores. Imbape fafis vyavir fyadores, mura dow vinkundi ma kyorwef Sarai i.

5Mura ido Sarai dawos faro Abram i, “Yavuk infamyan ayedi Hagar i kwar faro au fa nwa ve swa, ma fafisu ifawi kaku fyadores mura ido kyorwef aya. Inja Sasar bediri. IvyeManseren Allah vye user frur evesya ine faro au ma aya.”

6Abram kyarem faro i, “Rwower, vinfyan bedirya ma kyunem ro bav bedi; wafrur yov i ra mov wamarisen raya.” Muraido Sarai vye navye Hagar iva ma vye wayam kaku i, inja Hagar ifrar ibur i.

7Manakya Manseren Allah vyedi isrow kuker Hagar i ro war sun vero sup veve ursva, fanam nyan rayuk veso mura ve Syur. 8Manakya ani ifuken, “Hagar, vinfyan Sarai vyanawi rwa kero ma ive rwave?”

Hagar kyarem ve i, “Yafrar yabur vin amber ayedi Sarai i.”

9Manakya ani ikofen; “Kwaver ve i ma wuf farmyan i.” 10Manakya anya dawos wer, “Nari yavuk ve au romawa kpu sibor kaku, manseiryano nari kyor napok si va. 11Fyoro va ido nari waven romawa snono ma nwir ive Ismael,1 snar Manseren Allah ryower kwar kankanes bena. 12Imbape romawa anya nari ikenem imnis keledai verafdi; romawa anya nari fyanfavri kuker snonkaku, ma snonkaku sya nari sfanfavri kuker i. Romawa anya nari ikenem ro vondi bur naek vyesyakam.”

13Hagar ifuken ro sneri, “Kaku ke yamam Allah I kwar, vemam faduru aya?” Rarirya Hagar dap Manseren Allah veyawawos kwar faro i anya, “Au Allah vemam faduru aya.” 14Evedar fa sap war veyer ro swaf Kades ma Bered anya, “War veyer Lahai-Roi.”2

15Rarirya Hagar i ikapar romawa snonya, ma kmar Abram, nyir romawa anya ve Ismael.3 16Fafisu anya Abram ras kenem vyeja, pasivarek samfur di war seser di wonem.