Sarmur 15

Ananun Allah kuker Abram

1Posa ido, Abram myam mamam oso ma imnaf Manseren Allah dawos faro i vo dove, “Abram wamkak awer, nari yakadaun au ro marindi venyanem au, ma yavuk vavyak veba kaku faro au.”

2-3Imbape Abram dove, “Manseren Allah Mamboryas, buk romawayo ve ayava. Snonkaku nari eve knam arasai vebor ayena iyer monda Elieser i, manfyan yun ro Damsyik ani. Inja faindayova fa Manseren Allah buk vavyak ve aya.”

4Romura Abram imnaf Manseren Allah ikofen yov i vo dove, “Manfyan bedinema nari vye knam nana bannaneva imboi romawa snon karyer mankundaw bedi.” 5Manseren Allah dun Abram i ve vondi ma ikofen faro i, “Mambe nank iyaswa ma kwor karapan mak sya, nari wasmai rer1 sibor kaku raris mak siyaswa.”2

6Abram ikyar faro Manseren Allah I ma ro diya Manseren Allah kyori ve snonkaku vefrur marisen sneri.3

7Posa ido Manseren Allah dawos faro i, “Aya Manseren Allah vefarkin au fafisu wasasyar ro sup Ur ro Babilonia, ma vevuk saprop ine faro au fa nwave sup mankun.”

8Vape Abram ifuken, “Sye, Manseren Allah vekain ro mov Vekaki Syadi kaku, mov risai yafawi kaku nari yana saprop ine ve sup mankun raya?”

9Manseren Allah kyarem ve i, “Wun ma ve Aya sapi vin oser, kambing vin oser, ma domba snoman oser, si vardi se pasivarek ri kyor, ma kako manveyoren ma mandun oser.” 10Irya Abram dun aiwan ansya faro Allah I. Sapi, kambing ma domba sya sivardi skes si ra sve vardi suru, insape srir si fa skar yaye syos ri suru. Imbape man ansya ido sisiper. 11Man vebor veyan kraf sirwai fa ive san kraf ansya, Abram iyau si.

12Fafisu ori syun murvav, Abram denef moser imnis raris snonkaku vemar. Fyoro va pampanya ikawef i inja imkak namsinba kaku4 13Manseren Allah ikofen faro i; “Waswar epen, kpu besya nari sve kawasa mandaman ro sup vese; nari sve women ro diwa ma na sve wayam si pasivarek utin di fyak.5 14Imbape er eve wayam si ve women ansya nari yamunsu vesi posa ido kpu besya nari sisasyar bur sup ani, ma sun sfaryan nana nabor kaku.6 15Au vardi nari ras kenem bedi ikwan kaku rawo pik bena napyoper; nari wamar kuker kananon, insape sikram au.

16Kpu besya syos ri fyak isyonde ido, nari skaver wer muma ve dine. Fafisu ine Yayaw snonkaku Amori sine bur sup ine baim rao varvor sena nfamfanfon ra nabor kaku, insape Yamsor si ma Yaveninyan si.”

17Fafisu rovya, fyoro va sayer vepawya ma amyas vesak oso, suyunuk ro fandu rofanfan kraf ansi. 18Kur anya veri Manseren Allah, fyes eren kuker Abram i. Manseren Allah dove; “Yakofen kaku ve au; sup ine kasiper nari Yavuk i faro up besya, randak ro yawek sup Mesir isof marei veba Efrat,7 19kako sup Keni, Kenas, Kadmon, 20Het, Feris, Refaim, 21Amori, Kanaan, Girgasi, ma Yebus.”