Sarmur 14

Abram fyaspar Lot i

1Fafisu Abram vyarek fanam Hebron, wairek ri fyak, ro var wamurem, sisoine; Amrafel wairek Babilonia, Ariok wairek sup Elasar, Kedorlaomer wairek sup Elam, ma Tideal wairek sup Goyim, skoryur skove oser fa 2skomamun kuker wairek ri rim ro var wambarek, sisoine; Bera wairek Sodom, Birsya wairek Gomora, Syinab ro sup Adma; Semeber wairek ro Seboim ma wairek oso wer vera ker sup Bela rovaido sup Soar. 3Wairek ri rim anskoine skove oser ma skoryur rak mamun skovesya ro kadwas Sidim, mov babo kir ine sap ve Soren vemar. 4Pasivarek samfur seser di suru wairek ri rim anskoine skove women faro wairek veba Kedorlaomer i, imbape ro pasivarek veve samfur seser kyor ine wairek anskoine skove mbrov wairek Kedorlaomer i. 5Inja ro pasivarek veve samfur seser fyak, Kedorlaomer ma wairek eve kayam kuker i sun rak mamun sesya ma sembrov kuker kawasa Refaim ro sup Asyterot-Karnaim, kawasa Susim ro Ham, kawasa Emim ro Syawe-Kiryataim, 6ma kawasa Hori ro bonvepampyam Edom, seveyau vinkwan kaku ve varare maper ro sup El-Paran. 7Rodiya snonkaku veyom ansya siwarye ve En-Mispat, mov babo kir ine sap ve Kades. Skomamun yar ma skovriwarek sup Amalek, ma skomerkar kako snonkaku Amori eve mnu ro Haseson-Tamar.

8Rarirya kako wairek vebor ro sup Sodom, Gomora, Adma, Seboim ma Bela sisasyar fa sfasos snon mamun sesya ro dwas Sidim 9fa smamun kuker wairek Elam, Goyim, Babilonia, ma Elasar; inja wairek ri fyak sko ve mbrov wairek ri rim. 10Dwas ani ifo kuker marser aspal, inja fafisu wairek Sodom ma Gomora suve sewar fa sufrar subur mamun veba anya, snon mamun suvesya siya sisapi ro marser aspal anna. Wairek ri kyor sifrar sibur ve bonvepampyam na. 11Wairek ri fyak vesambrav ansya, sfasyar pres roi vebor vero Sodom ma Gomora, ma rovean vebor na kako, posa ido sibur. 12Abram fno vye Lot i kyain ro Sodom, mura sun i kako warpu nana vebor vyena kam.

13Imbape snon oser vefaspar ro mamun veba anya ikofen vadir pres roi evesya annakam ve Abram, snon Ibrani anya. Abram vyarek ve mandaman ro saprop mnuk Mamre snon Amoriya vyedi, fanam aiknam tarbantin anya. Mamre ma naek vyesuya susoine Eskol ma Aner. Snonkaku anskoine skove oser fa skomamun so Abram i. 14Fafisu Abram imnaf romawa fno vyani sun i ve women, mura iryur snon vebor vero mov vye ryar ro nanya, snon vefawi vemamunsya utin di kyor samfur eser seser di war, insape iyom wairek ri fyak ansya ra isof kota Dan. 15Ro mov anya Abram irwas snonkaku vyansya fa sve rarwas ri veso, insape ro mun rovya fyarmun mrov vyansya ma imerkarsi. Iyau myun si ra isof ro Hoba vero var wambrur kota Damsyik. 16Abram dun kaver roi vebor sfasyar anna, kuker Lot i ma nana vebor vyanna, var vin sya ma women vesesya.

Melkisedek vye vok Abram i

17Posa ro imerkar wairek Kedorlaomer kuker wairek vewarpu insya, insape Abram kyaver. Muraido wairek Sodom rya isrow kuker Abram i ro Kadwas Syawe, kadwas ine sap kako i ve Kadwas Wairek. 18Melkisedek, wairek Salem vekif nasan imam Allah Vekaki Syadi Kaku, dun mamami ma anggur sya ve Abram i,1 19Posa vye vok Abram i ma dawos ve i radine, “Ivye Allah Vekaki Syadi Kaku, vefakais nanki ma sup swan ine vye vok au! 20Sandik faro Allah Vekaki Syadi Kaku, vevuk fa wamerkar mbrov besi.” Posa ro diya Abram vyuk faro Melkisedek i roivebor fyasyar fa dun kaver anna barborya rarwas-var samfur.

21Posa wairek Sodom dawos faro Abram i, “Kwaver monda snonkaku ayansya imboi nana vebor fasyar annakam wun na.”

22Imbape Abram, kyarem faro i, “Yafores ro varpon Manseren Allah Vekaki Syadi Kaku, Vesarmur nanki ma sup swan, 23yapok yun roker mkuno vaveri ro nana banna, ma ro kavrai pusyom rova kavrai karsyower besya kako. Rarirya nari wapok wawos vo wove, ‘Aya vefrur fa Abram ismai nana naborya.’ 24Yamewer yun royo-royo vardi ve aya ndi. Imbape rosai snonkaku ayansine san kwarna, yasmai na ra diri. Imboi ivye kada manivov-manivov vewarpu ayanansya, sisoine Aner, Eskol ma Mamre, skoiso veyun rarwas var skovena.”