Sarmur 11

Kaderen Babel

1Randakya er vebor vero supswan ine kasiper sna wos oser ma mkarem oser monda. 2Fafisu anya sisasyar bur mov skain vepon roya ma simbran ve var wamurem, isof sisrou saprop veyavam ma vepyom oso ro Babilonia, mura skain pdef ro diya. 3Fafisu ri veso nawas ido sawos yaye ve si ra dine, “Mkorama kofrur kerui no ve apyak ma kokun na fa npakrek.” Rarirya sismai kerui apyak vefrur rum na ma saprop kararof kerui na. 4Insape sikofen yaye ve si, “Mkorama kovawes kota oso ma komarar kaderen vekaki ra pumya kyer mandepi, insa kosmai snonsnon ma kokakek awer ro supswan ine bori.”

5Mura Manseren Allah isabu fa myam kota ma kaderen snonkaku sya svawes ani. 6Manseren Allah ikofen, “Snonkaku sine er oser kuker wos oser, ine irya randak ro au sena. Fyoro va ido nari sifrur roi veba syadi kakuno wer. 7Ivye Kosabu fa korvaren wos sedi insa sifawi yaye awer wos sawos na.” 8Rarirya Manseren Allah vye si fa skakek ve supswan ine kasiper. Inja simnai vo svawes pdef kota anyava. 9Evedar kota anya snir i ve Babel,1 snar ro mov anya Manseren Allah irvaren wos ro er vebor ansyakam, ma ro mov anya kako Manseren Allah vye si fa skakek ve supswan ine kasiper.

Sem kpu vyesi

10Sine sirya romawa ma kpu Sem vyesi. Pasivarek ri suru posa ro favruv veba anya, fafisu Sem ikenem pasivarek usin oser, ikapar romawa snon oso venirve Arpakhsad. 11Raimnai ikenem kaker pasivarek usin ri rim wer, ma ikapar romawa inai sya wer.

12Fafisu Arpakhsad ikenem pasivarek samfur ri kyor seser ri rim, ikapar romawa snon oso, snori Selah. 13Raimnai Arpakhsad ikenem kaker pasivarek usin ri fyak seser ri kyor wer, ma ikapar romawa inai sya wer.

14Fafisu Selah ikenem pasivarek samfur ri kyor, ikapar romawa snon oso, snori Eber. 15Raimnai Selah ikenem kaker pasivarek usin ri fyak seser di kyor wer, ma ikapar romawa inai sya wer.

16Fafisu Eber ikenem pasivarek samfur ri kyor seser ri fyak, ikapar romawa snon oso, snori Peleg. 17Raimnai Eber ikenem kaker pasivarek usin ri fyak seser samfur ri kyor, ma ikapar romawa inai sya wer.

18Fafisu Peleg ikenem pasivarek samfur di kyor, ikapar romawa snon oso, snori Rehu. 19Raimnai Peleg ikenem kaker pasivarek usin risuru seser ri siw, ma ikapar romawa inai sya wer.

20Fafisu Rehu ikenem pasivarek samfur ri kyor seser ri suru, ikapar romawa snon oso, snori Serug. 21Raimnai Rehu ikenem kaker pasivarek usin ri suru seser ri fik ma ikapar romawa inai sya wer.

22Fafisu Serug ikenem pasivarek samfur ri kyor, ikapar romawa snon oso, snori Nahor, 23Raimnai Serug ikenem kaker pasivarek usin ri suru, ma ikapar romawa sya wer.

24Fafisu Nahor ikenem pasivarek samfur ri suru seser ri siw, ikapar romawa snon oso, snori Terah. 25Raimnai Nahor ikenem kaker pasivarek usin oser samfur seser ri siw, ma ikapar romawa inai sya wer.

26Fafisu Terah ikenem pasivarek samfur ri fik, ikapar romawa snon ri kyor, skoisoine Abram, Nahor ma Haran.

Terah kpu vyesi

27Terah kpu vyesi siso sine: Terah ikapar Abram, Nahor ma Haran. Haran ikapar romawa snonya snori Lot. 28Haran imar ro sup marin skovedi, isoine Ur ro Babilonia, fafisu kmar Terah ikenem kaker. 29Abram fyarvuk kuker Sarai, ma Nahor fyarvuk kuker Haran inai vyedi isoine Milka. Haran ismai romawa snon oso wer isoine Yiska. 30Imbape Sarai i pyasnasem.

31Terah ibur Kota Ur ro Babilonia fnovek romawa vyedi Abram, kpu vyedi Lot, ma imbikin vyedi Sarai, isoine Abram swari. Terah kyara fa skombran ve sup Kanaan. Imbape fafisu skora ro Haran, skokain pdef ro diya. 32Ro mov anya kako Terah imar fafisu vye pasivarek usin ri suru seser ri rim.