Sarmur 12

Abram ismai fararyor ro Allah

1Manseren Allah dawos faro Abram i, “Wabur sup marin bedi, naek besya ma kako kmami rum vyeja, ve sup nari Yakur fasnai faro au.1 2Nari Yavuk ve au fa kpu besya sibor kaku ma nari sve er veba kaku. Nari Yave vok au ma Yafrur fa snonsnon bedi iryer, snar au, kawasa vebor nari sismai vok.

3Nari Yave vok snonkaku eve vok au sya

ma yafras snonkaku vefras au sya.

Ma snar au

Nari yave vok er vebor vero supswan ine syakam.”23

4-5Abram ras kenem vyedi vye pasivarek samfur di fik seser di rim fafisu isasyar bur Haran, raris Manseren Allah wanwan Vyedi faro i. Abram imbran be Kanaan kuker swar Sarai i ma fno vyedi Lot i, ma nana vebor vyena kuker manfyan infyan ismai kwar ro Haran.

Fafisu ifyafer kwar ro Kanaan, 6Abram imbran yar sup ani isof syuver ro aiknam veba tarbantin4 ro More,5 fanam Sikhem. Fafisu anya snonkaku Kanaan sya sisya skain ro sup ani. 7Manseren Allah fyasnai mankundi faro Abram ma dawos faro i, “Ine irya sup nari yavuk faro kpu besya.” Muraido Abram daker apen farsarser oso rodiya faro Manseren Allah befasnai mankundi kwar faro i.6 8Ramnai ido imbran pdef maran vyeja ve var wamires, ve mov eve bonuk ro Betel var wamuremya, ro swaf Betel ma Ai: Betel ryo var wambarek ma Ai ryo var wamurem. Vyaus apen farsarser faro Manseren Allah I ma dap snonsnon Vyedi. 9Posa Abram imbran wer, rarirya imbran binkwan kaku, isof ro var wamires sup Kanaan.

Abram ryo Mesir

10Imbape fafisu anya basbiser veba kakuya myun ro sup Kanaan, isof ro Abram rya ve Mesir fa ikenem ro diya rao basbiser ani isyonde. 11Fafisu ive syun be sup Mesir, ikofen yov swar Sarai i, “Swa ayedi, wapyum fafayava. 12Inja Snonkaku Mesirsya smam au ido na skara vo sove swa ayediso au mura na smun aya imboi sfakman au fa wakenem. 13Inja ipyum syadi wakofen vo wove au ido srar ayedi, insama sfakman aya fa yakenem ma sve navye aya.”7 14Kakara Abram vyanya kyaku, fafisu Abram ryandum kwar ro Mesir ido, snonkaku Mesirsya smam Sarai ipyum fafayava. 15Faker Firaun vyesya ono smam Sarai i mura sikofen vadir padakduk vyedi faro Firaun i; mura ido sun i ve Firaun aidoran vyedi. 16Sarai vyedar, Firaun vyenavye Abram i ma vyuk manfyan infyan, rofanfan domba ma kambing, sapi, keledai ma unta ve i.

17Imboi snar Firaun dun Sara i fa nya ve swa, mura Manseren Allah vyuk duf veba na fa nmun Firaun i ma kawasa vebor vero aidoran vyanyansya. 18Mura Firaun dor Abram i ma ifuken i, “Rosai wafrur kwar yov aya ine? Swa bedisine raisya vo wakofen isnaiva. 19Wakofen vo wove srar bediri evedar yun i fa ive yana ve swa. Swa bani, isine; inja wun i ma wabur mov ine!” 20Insape Firaun vyuk sasoser ve faker vyesya fa sun Abram i, swari ma kawasa vyesya fnovek nana sena kam fa sisasyar bur sup anya.