जकरयाह 6

चारठे रथन के सपना

1मै फेर आंखी उप्पर उठायों, अउ का देखो कि दुइठे डोंगरन के बीच लग चारठे रथ चले आथै, अउ उन डोंगर पीतर के हबै। 2पहिले रथ हे लाल घोडवा अउ दूसर रथ हे करिया।1 3तीसर रथ हे चरका अउ चउथा रथ हे चितकबरा अउ मजबूत घोडवा हबै। 4तब मै ऊ दूत लग जउन मोर लग बात करत रथै, पूंछो, “हे मोर परभु, हइ सगलू काहिन हबै?” 5दूत मोर लग कथै, “हइ बादर के चारो हवा आतमा हबै, जउन सगलू भुंइ के परभु के लिघ्घो हाजिर रथै, पय अब निकड आय हबै।2 6जेखर रथ हे करिया घोडवा हबै, ऊ उत्तर देस के पल्ला जथै, अउ चरका घोडवा पस्चिम के पल्ला जथै, अउ चित-कबरा घोडवा दक्खिन देस के पल्ला जथै। 7मजबूत घोडवा निकड के चाहथै कि जायके भुंइ हे चक्कर लगाबै।” पय दूत कथै, “जायके भुंइ हे चक्कर लगाबा।” तब उन भुंइ हे चक्कर लगामै लगिन। 8तब ऊ मोर लग पुकारके कथै, “देख, उन जउन उत्तर के देस कर पल्ला जथै, उहां मोर आतमा के सान्त करे हबै।”

यहोसू कर राज-तिलक

9फेर यहोबा कर हइ बचन मोर लिघ्घो पहुंचथै, 10गुलामी मनसेन मसे हेल्दै, तोबिय्याह अउ यसायाह लग कुछु ले अउ उहै रोज तै सपन्याह कर टोरवा योसियाह के घर छो जा जेहमा बेबीलोन लग आय हबै। 11उनखर हाथ लग सोन-चांदी ले, अउ मुकुट बनाय के उनही यहो-सादाक3 के टोरवा यहोसू पुजारी के मूंड हे धर, 12अउ उनखर लग हइ कथै, सिपाही के यहोबा हइ कथै, ऊ डउका के देख जेखर नाम डगइल हबै, ऊ अपन जिघा हे उग के यहोबा के मंदिर के बनाही। 13उहै यहोबा के मंदिर के बनाही अउ महिमा पाहीं, अउ अपन राजगद्दी हे बिराज-मान हुइके राज करही। ओखर लिघ्घो राजगद्दी हे अक्ठी पुजारी बइठे रही, अउ दुनो के बीच सान्ति के सलाह होही। 14अउ उन मुकुट हेलेम, तोबिय्याह, यसायाह, अउ सपन्याह कर टोरवा हेन के मिलै, अउ उन यहोबा के मंदिर हे सुरता के निता बने रही। 15“फेर दुरिहां-दुरिहां कर मनसे आयके यहोबा कर मंदिर बनामै हे मदत करहीं, अउ तुम जान जइहा, कि सिपाही के यहोबा मोके तुम्हर लिघ्घो पठोय हबै। अगर तुम मन लगायके अपन भगवान के आदेस के पालन करिहा, ता हइ बात पूर होही।”