जकरयाह 5

उडत हर रोल-चिट्ठी के सपना

1जब मै लउटेव अउ आंखी उठायों ता का देखों, कि अक्ठी लिखे हर चिट्ठी उडथै। 2दूत मोर लग पूछिस, “तोके काहिन दिखथै?” मै कथो, “मोके अक्ठी लिखे हर चिट्ठी उडत दिखथै, जेखर लम्बाई बीस हाथ अउ चउडाई दस हाथ के हबै।” 3फेर ऊ मोर लग कथै, “एहमा ऊ सराप लिखे हबै जउन सगलू देस हे पडैबाले हबै। चिट्ठी कर अक पल्ला लिखे हबै कि सगलू कउ चोरी करै बाले देस लग निकार दय जही, अउ दूसर पल्ला लिखे हबै कि सगलू कउ जउन किरिया खायके झूठ बोलथै, उके लइ ले जही। 4सिपाही कर यहोबा कर इहै बचन हबै, उके मै असना चलइहों कि ऊ चोरटा के घर हे अउ मोर नाम के झूठी किरिया खाय बाले के घर हे घुस के ठहरही, अउ उके लकडी अउ पथरन के नास कर देही।”

टोपरी हे डउकी कर सपना

5तब जउन दूत मोर लग बात करथै, ऊ आगू जायके मोर लग कथै, “अपन आंखी उप्पर उठा अउ देखा तुम्हर आगू का जथै?” 6मै पूछो, “ऊ काहिन हबै?” ऊ कथै, “ऊ चीज जउन निकडत जात हबै, ऊ अक्ठी टोपरी1 हबै, जउन सगलू देस कर पाप के दरसाथै ।” 7फेर मै का देखो कि टोपरी कर सीसा कर ढक्‍कन उठाउत जात हबै, अउ अक्ठी डउकी हबै, जउन टोपरी के बीच हे बइठे हबै। 8दूत कथै, “एखर मतलब दुस्ट हबै।” अउ ऊ डउकी के टोपरी के बीच हे मूंद दइस, अउ सीसा के ऊ ढक्‍कन लग टोपरी कर मुंह बंद कर दइस। 9तब मै आंखी उठायों, ता का देखों कि दुइठे डउकी कढ जथै, जिनखर पोखडी हवा हे फइलै हर हबै, अउ उनखर पोखडी सारस चिरइया के जसना हबै, अउ उन टोपरी के बादर अउ भुंइ के बीच हे उडाय लइ जथै। 10तब मै ऊ दूत लग जउन मोर लग बात करथै, पूंछो, “उन टोपरी के कछो लइ जथै?” 11उन कथै, “सिनार देस हे लइ जथै, कि उहां ओखर निता अक्ठी भवन बनाही, अउ जब ऊ तइयार करे जही, ता टोपरी के पूजा के निता उहां जही।”