जकरयाह 4

दीवट के सपना

1फेर जउन दूत मोर लग बात करथै, ऊ आय के मोके असना जगाथै, जसना कउनो मनसे नींद लग जगाय जाय। 2ऊ मोर लग पूछिस, “तोके काहिन दिखाई देथै?” मै कथो, “अक्ठी दीवट हबै, जउन सगलू सोन के हबै, अउ ओखर खोरिया ओखर इटिल्ली हे हबै, अउ उहै ओखर सातठे चिमनी हबै, जेखर उप्पर बत्ती के निता सात-सात नाली हबै। 3दीवट के लिघ्घो जैतून के दुइठे रूख हबै, अक्ठी ऊ खोरिया के दहिना पल्ला अउ दूसर ओखर टेटरा पल्ला।” 4तब मै ऊ दूत लग जउन मोर लग बात करथै, पूंछो, “हे मोर परभु, हइ काहिन हबै?” 5जउन दूत मोर लग बात करथै, ऊ मोके जबाब देथै, “का तै नेहको जानथस कि हइ काहिन हबै?” मै कथो, “हे मोर परभु, मै नेहको जानथो।”

जरुब्बाबेल लग भगवान कर टीमा

6तब उहै मोके जबाब दइके कथै, “जरुब्बा-बेल के निता यहोबा कर हइ बचन हबै, न बल लग, अउ न सक्‍ति लग, पय मोर आतमा के दवारा होही, मोर सिपाही के यहोबा कर इहै बचन हबै। 7हे बडा डोंगर, तै काहिन हबस? जरुब्बा-बेल के आगू तै पटउरा हुइ जइहे, अउ ऊ इटिल्ली कर पथरा हइ गोहरउत आही, ओखर हे अनुगरह होय, अनुगरह।” 8फेर यहोबा कर हइ बचन मोर लिघ्घो पहुंचथै, 9“जरुब्बा-बेल अपन हाथन लग हइ भवन के नीह डारे हबै, अउ उहै अपन हाथन लग उके तइयार करही, तब तै जनिहें, कि सिपाही कर यहोबा मोके तुम्हर लिघ्घो पठोय हबै। 10काखे कोनहर नान बातन के रोज बेकार जाने हबै? यहोबा अपन हइ सात आंखी लग सगलू भुंइ हे देखके साहुल के जरुब्बा-बेल के हाथ हे देखही, अउ खुस होही।”1 11तब मै उनखर लग फेर पूछो, “हइ दुइठे जैतून के रूख काहिन हबै, जउन दीवट के दहिना-टेटरा पल्ला हबै?”2 12फेर मै दूसर बेर उनखर लग पूछो, “जैतून के दुनोन डगइल काहिन हबै, जउन सोन के दुनोन नाली के दवारा अपन मसे सुनेहरा तेल उडेलथै?” 13ऊ मोर लग कथै, “का तै नेहको जान-थस कि हइ काहिन हबै?” मै कथो, “हे मोर परभु, मै नेहको जानथो।” 14तब ऊ कथै, “एखर मतलब ताजा तेल लग भररे हर उन दुइठे डउका हबै, जउन सगलू भुंइ के भगवान के लिघ्घो खडा रथै।”