जकरयाह 3

बडा-पुजारी के बारे हे अक्किल बाले के सपना

1फेर ऊ यहोसू पुजारी यहोबा कर दूत के आगू ठाढ हुइस मोके देखाइस, अउ भुतवा ओखर खउनी पल्ला ओखर बिरोध करै के ठाड रथै।1 2तब यहोबा भुतवा लग कथै, “हे भुतवा, यहोबा तोके गधारै, यहोबा जउन यरुसलेम के अपनाय लेथै, उहै तोके दोसी ठहराबै, का हइ डउका आगी लग निकारे हर लकडी के जसना हबै?” 3उहै टेम यहोसू तउन दूत के आगू मइलाय हर कपडा पहिरे हर ठाड रथै। 4तब दूत ओखर लग जउन आगू ठाड रथै, कथै, “एखर हइ मइलाय हर कपडा उतारा।” फेर दूत यहोसू लग कथै, “देख मै तोर बुराई दुरिहां करे हव, अउ मै तोके सुंदर कपडा पहिराय देथो।” 5तब मै कथो, “एखर मूड हे अक्ठी सुध्द मुरेठा बांधे जाय।” पय उन ओखर मूड हे पुजारी के ओग सुध्द मुरेठा बांधिस, अउ उके कपडा पहिरा-इस, ऊ टेम यहोबा कर दूत लिघ्घो ठाढ रहै। 6तब यहोबा कर दूत यहोसू के चेतन्त दइके के कथै, 7“सिपाही कर यहोबा तोर लग हइ कथै, अगर तै मोर गली हे चलबे, अउ जउन कुछ मै तोके सउप दय हव, ओखर मदत करिहे, ता तै मोर भवन कर नियाव करै बाले अउ मोर अंगना के रक्छक होही, अउ मै तोके इनखर बीच हे आमै जाय देहुं जउन लिघ्घो ठाड हबै। 8हे यहोसू पुजारी, तै सुन ले, अउ तोर भाई-बन्धु जउन तोर आगू बइठे हबै, सुन काखे उन अदभुत चिन्ह डउका काखे देखा मै अपन हरवाह के डगइल के परगट करहुं। 9ऊ पथरा के देख जेही मै यहोसू कर आगू धरे हव, ऊ अक्ठी पथरा के उप्पर सातठे आंखी बने हबै, सिपाही के यहोबा कर हइ बचन हबै, देख, मै ऊ पथरा हे अक्छर खोद-वाहुं, अउ हइ देस के बुराई के अक ही रोज हे दुरिहां कर देहुं। 10उहै रोज तै अपन-अपन परोसी के अंगूर कर रूख अउ अंजीर कर रूख तरी आमै के निता बुलइहा, सिपाही के यहोबा कर इहै बचन हबै।”2