जकरयाह 2

नापै बाले डोरा कर सपना

1फेर मै अपन आंख उप्पर उठायों ता का देखो, कि हाथ हे नापै के डोरा लय हर अक्ठी डउका हबै।1 2तब मै ओखर लग पूछथो, “तै कछो जथस?” ऊ मोर लग कथै, “यरुसलेम के नापै जथो, कि देखों ओखर चउडाई अउ लम्बाई केतका हबै।” 3तब मै का देखो, कि जउन दूत मोर लग बात करथै, ऊ कढ गइस, अउ दूसर दूत ओखर लग मिलै के निता आथै, 4दूत ओखर लग कथै, दउरके, अउ ऊ जबान लग हइ गुठे, “यरुसलेम सहर के मनसे एतका बढ जही, ओहमा एतका मनसे अउ पसु बसहिन कि ऊ गांवन के जसना बिगर भीठी के सहर बन जही। 5यहोबा कर हइ बचन हबै, कि मै ओखर चउगिरदा पल्ला आगी के जसना भीठी ठहरइहों, अउ उनखर बीच हे उजियार होयके दिखाई देहुं।”

गुलामिन के घर आमै के निता बुलाय जायके

6यहोबा कर हइ बचन हबै, “देखा, सुना, उत्तर के देस मसे भग जा, काखे मै तुमके बादर के चारो हबा के जसना तितिर-बितिर करे हव। 7हे सिय्योन तै जउन बाबुल के टोरिया के संग रथस, अपन खुद के बचाय ले। 8काखे सिपाही के यहोबा हइ कथै, ऊ उजियार के परगट होय के बाद ऊ मोके उन राजन के लिघ्घो पठोय हबै, जउन तुमही लूटथै, काखे जउन तोके छीथै, ऊ मोर आंखी के पुतली के छीथै। 9देखा, मै अपन हाथ उनखर हे उठइहों, तब उन उनखरै लग लूट लय जइहिन, जउन उनखर हरवाह होय रथै, तब तै जान जइहे कि सिपाही के यहोबा मोके पठोय हबै। 10हे सिय्योन, ऊंच आरो लग गा, अउ खुसी मना, काखे देख, मै आयके तोर बीच हे निबास करिहों, यहोबा कर इहै बचन हबै। 11उहै टेम बोहत राज यहोबा लग मिल जइहीं, अउ मोर मनसे हुइ जइहीं, अउ मै तोर बीच हे निबास करिहों, अउ तै जनिहें कि सिपाही के यहोबा मोके तोर लिघ्घो पठोय दय हबै, 12अउ यहोबा यहूदा के पवितर देस हे अपन भाग कर लेही, अउ यरुसलेम के फेरै अपन ठहराही। 13हे सगलू परानिन, यहोबा कर आगू चुप रहा, काखे ऊ जगके, अपन पवितर निबास जिघा लग निकडे हबै।”