जकरयाह 1

परभु के पल्ला लउटै के बुलाथै

1दारा राजा के राज के दूसर साल के अठमा महिना हे जकर-याह अक्किल बाले के लिघ्घो जउन बेरेक्याह के टोरवा अउ इद्दो कर पोता रथै, यहोबा कर हइ बचन पहुंचथै।1 2जकर-याह कथै, “यहोबा तुम्हर मनसेन के पुरखन लग बोहत गुस्सा होय रथै। 3इहैनिता तै इन मनसेन लग कह, सिपाही के यहोबा हइ कथै, तुम मोर पल्ला फिरा, सिपाही के यहोबा कर इहै बचन हबै, तब मै तुम्हर पल्ला फिरहुं, सिपाही के यहोबा कर इहै बचन हबै। 4अपन पुरखन के जसना झइ बना, उनखर लग बीते हर टेम आगू के बात गुठे बाले हइ गोहराय-गोहराय के कथै, सिपाही के यहोबा हइ कथै, अपन बेकार गली लग, अउ अपन बुरे पापन लग फिरा पय उन नेहको सुनिन, अउ न मोर पल्ला धियान दइन, यहोबा कर इहै बचन हबै। 5तुम्हर पुरखा कछो रहिन? अक्किल बाले का हर-मेसा जिन्दा रथै? 6मै अपन सेवकन के, आगू कर बात गुठे बाले के दवारा तुम्हर पुरखन के आदेस अउ चेतन्त दइस, पय उन उनके अनदेखा करिस, अउ उनखर परिनाम भुकतै। तब उन पस्चाताप करिस अउ स्बीकार करिस कि मुझ सर्वसक्तिमान यहोबा उनके ओसनेन सजा दय हबै। जसना उन पामै के ओग रथै, अउ जसना मै ठाने रथों।”2

घोड-वन के बारे अक्किल बाले कर सपना

7दारा राजा के दूसर साल के सबात3 महिना के ग्यारहमा महिना के चउबिस रोज के जकर-याह अक्किल बाले के लिघ्घो जउन बेरेक्याह कर टोरवा अउ इद्दो के पोता रथै, यहोबा कर बचन पहुंचथै। 8“मै रात के सपना हे काहिन देखों, कि अक्ठी मनसे लाल घोडवन हे चढे हर उन मेंह-दियन रूख के बीच ठाढ हबै, जउन घाटिन के तरी हे हबै, अउ ओखर पाछू लाल अउ चित-कबरा अउ चरका घोडवन ठाड हबै।4 9तब मै कथो, हे मोर परभु हइ कउन हबै? तब जउन स्वरग-दूत मोर लग बात करत रथै, ऊ मोर लग कथै, मै तोके गुठेहूं, कि हइ कउन हबै। 10फेर जउन डउका मेंह-दियन रूख के बीच ठाड रथै, ऊ कथै, हइ ऊ हबै जउन भगवान भुंइ हे पता लगामै के निता मतलब घूमै के निता पठोय हबै। 11तब उन यहोबा के दूत लग जउन मेंहदियन रूख के बीच ठाड रथै, ऊ कथै, हम भुंइ हे घूमे हबन, अउ का देखन कि सगलू भुंइ हे सान्ति अउ चैन हबै। 12तब यहोबा कर दूत कथै, हे सिपाही कर यहोबा, तै जउन यरुसलेम अउ यहूदा के सहरन हे सत्तर साल लग गुस्सा हबस, इहैनिता तै उनखर हे कब तक दया नेहको करिहे? 13अउ यहोबा जबाब हे ऊ स्वरग-दूत लग जउन मोर लग बात करत रथै, निक्खा-निक्खा अउ सान्ति भरी सब्द सुनाइस। 14तब जउन स्वरग-दूत मोर लग बात करत रथै, ऊ मोर लग कथै, तै गोहराय के कह कि सिपाही यहोबा हइ कथै, मोके यरुसलेम सहर अउ सिय्योन के निता बडी जलन होय हबै। 15जउन राजन सुख लग रथै, उनखर लग मै गुस्सा हव, काखे मै तउन चुटु गुस्सा करे रथस, पय उन दुख के बढ दय हबै। 16हइ कारन यहोबा हइ कथै, अब मै दया करके यरुसलेम सहर छो वापिस लउट आयों, मोर भवन5 फेरै बनही, अउ यरुसलेम सहर हे नापै के डोरा डारे जही, सिपाही के यहोबा कर इहै बचन हबै। 17फेर हइ गोहराय के कह कि सिपाही के यहोबा हइ कथै, मोर सहर फेर निक्खा चीजन लग भर जही, अउ यहोबा फेर सिय्योन के सान्ति देही, अउ यरुस-लेम सहरन के फेर लग चुनी।”

सींग लग सम्बन्धित सपना

18फेर मै जउन आंखी उप्पर के पल्ला उठायों, ता का देखो कि चारठे सींग हबै। 19तब जउन स्वरग-दूत मोर लग बात करथै, ओखर लग मै पुछो, “हइ काहिन हबै?” ऊ मोर लग कथै, “हइ ऊ सींग हबै, जउन यहूदा अउ इस्राएल अउ यरुसलेम सहर के मनसेन के तितिर-बितिर करे हबै।” 20फेर यहोबा मोके चारठे कारीगर दिखाइस। 21तब मै पूछो, “हइ काहिन करै के निता आय हबै?” ऊ कथै, “हइ ऊ सींग हबै, जउन यहूदा के असना तितिर-बितिर करिस, कि कउनो मूंड नेहको उठाय सकिन, पय हइ कारिगर उनही भगामै के निता अउ उन राजन के सींगन के काट डारे के निता आय हबै, जउन यहूदा देस हे तितिर-बितिर करै के निता उनखर बिरुध्द कारीगर उनखर सीगन के टोरी।”