जकरयाह 12

भभिस्य हे यरुसलेम के मुकति

1इस्राएल के बारे हे यहोबा के कहे हर बचन, यहोबा जउन आकास कर तानैबाले, भुंइ के नीह डालैबाले अउ मनसे के आतमा कर बनामै बाले हबै, ओखर हइ बचन हबै, 2“देखा, मै यरुसलेम के चउ-गिरदा पल्ला के सगलू राज के निता लडखडाय देय के अंगूर कर रस कर खोरवा ठहराय देहूं, अउ जब यरुसलेम घेर लय जही, तब यहूदा के दसा ओसनेन होही। 3ऊ टेम भुंइ के सगलू राज यरुसलेम के बिरुध्द हे अकजिघा होही, तब मै उके एतका बडा पथरा बनाहूं, कि जउन उके उठइहों उन बोहत अध-मरहा हुइहिन। 4यहोबा के हइ बचन हबै, ऊ टेम मै हर अक्ठी घोडवा के घबराय देहुं, अउ ओखर उप्पर बइठे हर के पागलपन करिहों। पय मै यहूदा के घराना हे किरपा नजर रखहुं, जब मै दूसर राज के सगलू घोड-वन के अंधरा कर डरिहों। 5तब यहूदा के अधिपति सोचही, यरुसलेम के रहैबाले अपन भगवान, सिपाही के यहोबा के मदत लग मोर सहायक बनहिन।” 6“ऊ टेम मै यहूदा के अधिपति के असना कर देहुं, जसना लकडी के ढेर हे आगी लग भरिस अंगीठी या बोझा हे जलत हर चिमनी होथै, मतलब उन खउनी-टेटरा चउ-गिरदा पल्ला के सगलू मनसेन के भस्म कर डलहिन, अउ यरुसलेम जिहां अब बसे हबै, उहै बसे रही, यरुसलेम हे।” 7यहोबा पहिले यहूदा कर सेना के जउन तम्बून हे रथै, उनखर मुकति करही, कहुं असना झइ होय कि दाऊद के घराना अउ यरुसलेम के रहैबाले अपन-अपन घमंड के कारन यहूदा के बिरुध्द बडाई मारै। 8ऊ टेम यहोबा यरुसलेम के रहैबाले के माना ढाल लग बचाय लेही, अउ उहै टेम उनखर मसे जउन ठोकर खाय के होय ऊ दाऊद के जसना होही, अउ दाऊद के परवार भगवान के जसना होही, मतलब यहोबा के दूत के जसना जउन उनखर आगू-आगू चलथै। 9ऊ टेम मै उन सगलू राज के नास करै के परयास करिहों जउन यरुसलेम हे चढाई करहीं। 10मै दाऊद के परवार अउ यरुसलेम के रहैबाले हे अपन अनुगरह किरपा करै बाले अउ बिनती सिखामै बाले आतमा उडेलहुं, तब उन मोके तकहिन मतलब जेही उनही छेदे हबै, अउ ओखर निता असना रोइहिन जसना अक्ठी टोरवा के निता रोउत-पीटथै, अउ असना बोहत दुख मनाही, जसना पहि-लउठा कर निता करथै। 11ऊ टेम यरुसलेम हे एतका रोना-पीटना होही जसना मगिद्दोन के मइदान हे हद-द्रिम्मोन हे होय रथै। 12सगलू देस हे दुख होही, हर अक्ठी परवार हे अलगे-अलगे मतलब दाऊद के घराना के परवार अलगे, अउ उनखर डउकी अलगे, नातान के घराना के परवार अलगे, अउ उनखर डउकी अलगे, 13लेवी के घराना के परवार अलगे अउ उनखर डउकी अलगे, सिमीयन के परवार अलगे, अउ उनखर डउकी अलगे, 14अउ जेतका परवार रह गय होय, हर अक्ठी परवार अलगे-अलगे, अउ उनखर डउकिन अलगे-अलगे।