भजन 9

भगवान कर नियाय के निता धन्यबाद कर भजन

परधान बजामै बाले कर निता मुतलबैयन कर राग हे दाऊद कर भजन

1यहोबा मै पूर हिरदय लग तोर स्तुति करथों,

मै तोर अदभुत काम कर वरनन करिहों।

2तै मोके एतका खुसी लग बनाय हवस,

हे परम भगवान मै तोर नाम कर परसंसा कर गीत गाथों।

3जब मोर बैरी हारके पाछु हटथै,

उन तोर आगू ठोकर खायके नास होथै।

4काखे तै मोर नियाव अउ मुकदमा चुकाय हबस,

तै सिंहासन हे बिराजमान हुइके नेक लग नियाव करे।

5तै राज-राज के डांटा अउ दुस्टन के नास करे हबस,

तै ओखर नाम सबरोज कर निता मिटाय

दय हबै।

6बैरी जउन हबै, ऊ मर गइन,

ऊ सबरोज कर निता मिट गय हबै, अउ जउन सहरन के तै ढाय दय

ओखर नामो निसानो मिट गय हबै।

7पय यहोबा हरमेसा राजगद्दी हे बिराजमान हबै,

ऊ अपन राजगद्दी नियाव कर निता सिध्द करे हबै।

8अउ ऊ खुद दुनिया कर नियाव धरम लग करही,

ऊ देस-देस कर मनसेन के फइसला खराई लग निपटाही।

9यहोबा पिसे हर कर निता ऊंच गढ ठहरही,

ऊ समस्या कर टेम के निता ऊंच गढ ठहरही।

10तोर नाम के जानैबाले तोर उप्पर बिस्वास रखहिन,

काखे हे यहोबा तै अपन खोजिन के नेहको छांडे।

11यहोबा जउन सिय्योन हे बिराजमान हबै, ओखर भजन गाबा,

मनसेन कर बीच हे ओखर महाकामन के परचार करा।

12काखे खून कर बदला लेय बाले उनके सुरता करथै,

ऊ दीन मनसे के दुहाई के नेहको बिसरथै।

13हे यहोबा, मोर उप्पर अनुगरह कर।

तै जउन मोके मिरतू कर फाटक के लिघ्घो लग उठाथस,

मोर दुख के देख जउन मोर बैरी मोके देत हबै।

14ताकि मै सिय्योन कर फाटक कर लिघ्घो

तोर सगलू गुडन के वरनन करों,

अउ तोर करे हर मुकति लग खुस हुइहों।

15दूसर मनसे बाले जउन गडहा खोदे रथै,

उहै हे ऊ गिर पडिन, जउन जाला उन लगाय रथै, ओहमा उनखरै गोड फंस गइस।

16यहोबा अपन के परगट करिस, ऊ नियाव करे हबै,

दुस्ट अपन करे हर कामन हे फंस जथै।

17दुस्ट अधोलोक हे लउट जइहिन,

अउ ऊ सगलू दूसर मनसे जउन भगवान के बिसर जथै।

18काखे गरीब मनसे सबरोज तक बिसरे हर झइ रइहिन

अउ न तो नम्र मनसे के आसा हरमेसा कर निता नास होही।

19उठ, हे भगवान, मनसे हमला झइ करै

पामै मनसेन कर नियाव तोर आगू करे जाय।

20हे भगवान, उनके भय दे,

सब मनसे अपन के सिबाय मनसेन जानै।