भजन 80

रास्ट के फेरै स्थापना के बिनती

परधान बजामै बाले कर निता सोसन्नीमेदूत सुर हे आसाप कर गाना

1हे इस्राएल कर बरेदी, तै जउन यूसुफ के अगुवाई गेडरन कर जसना करथै, कान लगा,

तै जउन करूबन हे बिराजमान हबै,

अपन उजियार दिखा।1

2एप्रैम, बिन्यामीन,

अउ मनस्से कर आगू अपन सक्ति दिखायके,

हमार मुकति करै के आ।

3हे भगवान, हम के जसना के तसना कर दे,

अउ अपन मुंह के उजियार चमका, तब हमार मुकति हुइ जही।

4हे सेनाओ कर परभु भगवान यहोबा,

तै कब तक अपन परजा के मनसे के बिनती हे गुस्सात रइहे?

5तै आंसुन के उनखर खाना बनाय दय,

अउ गघरी भर भरके उनही आंसू पिलाय हबै।

6तै हमके हमर परोसिन के झगडे के कारन बनाय देथस,

अउ हमर बैरी मनमानी मजाक करथै।

7हे सेनाओ कर भगवान, हम के जसना के तसना कर दे,

अउ अपन मुंह के उजियार हमर हे चमका, तब हम बच जइबे।

8तै मिस्र लग अक्ठी अंगूर कर बेल लइ आने,

अउ तै राजन के निकार के उनखर देस हे लगाइस।

9तै ओखर निता जिघा तइयार करे हबस,

अउ ऊ जर पकरिस अउ बगर के देस के भर दइस।

10ओखर छाया डोंगरन हे फइल गइस,

अउ ओखर डगइल भगवान के देवदारन के जसना हुइ गय।

11ओखर डगइल समुंदर तक बढ गइस,

अउ ओखर अंकुर फरात नदिया तक बगर गइस।

12फेर तै ओखर बाडी के काखे गिरा दय,

कि सगलू गली रेंगइया ओखर अंगूर के टोरे हबै।

13डोंगरहा सूरा उके कचर डारथै,

अउ पटउरा के सगलू पसु उके चर जथै।

14हे सेनाओ कर भगवान, हमर पल्ला मुड,

स्वरग लग धियान दइके हमर पल्ला देख,

हमर मनसेन के बचा।

15हइ पउधा तै अपन खउनी हाथ लग लगाय,

अउ जउन रूख के डेगाइल2 तै अपन निता मजबूत करे हबस।

16ऊ आगी हे जर गइस, ऊ काट डारे गइस,

अउ तोर ताडना लग उन नास हुइ जाय।

17तोर खउनी हाथ के सम्हारे हर डउका हे तोर हाथ धरे रइहे,

ऊ मनसे हे, जेही तै अपन निता मजबूत करे हबस।

18तब हम मनसे तोर लग न मुडब तै हमके जिन्दा रख,

अउ हम तोरै नाम लेय करब।

19हे सर्वसक्तिमान परभु, हम के जसना के तसना कर दे,

अउ अपन मुंह के उजियार हमर हे चमका, अउ हम बच जइबे।