भजन 79

देस कर छुटकारा कर निता बिनती

आसाप कर भजन

1हे भगवान, राज तोर निजी भाग हे घुस आइन,

उनही तोर पवितर मंदिर के असुध्द करे,

अउ यरुसलेम के खंडर बनाय दय हबै।

2उनही तोर हरवाहन के लोथ के आकास के चिरइयन के खाना बनाय दइस,

अउ तोर भक्तन के मांस बनपसुन के खबाय दइस।

3उनही उनखर खून यरुसलेम के चारो पल्ला

पानी कर जसना बहाइस,

अउ उनखर माटी देयबाले कउनो नेहको रथै।1

4परोसिन कर बीच हमर बदनाम हुइस,

चारो पल्ला के रहइया हमर उप्पर हंसथै, अउ मजाक करथै।

5हे यहोबा, तै कब तक लगेतार गुस्सा करत रइहे?

तोर हे आगी कर जसना जलन कब तक भडकत रही?

6जउन रास्ट तोके नेहको जानथै, अउ जउन राजन के मनसे तोर लग बिनती नेहको करथै,

उनखर हे अपन सगलू गुस्सा उडेलिस।

7काखे उनही याकूब के लील लइस,

अउ ओखर निबास जिघा के उजाड दय हबै।

8हमर हानि कर निता पुरखन के अधरम के कामन के सुरता झइ कर,

तोर दया हरबी होय,

काखे हम बडा दसा हे पडे हबन।

9हे हमर मुकति करइया भगवान,

अपन नाम के महिमा के खातिर हमर सहायता कर,

अउ अपन नाम के खातिर हमके छंडाय के हमर पापन के छमा कर दे।

10दूसर देस काखे कहै पामै कि

उनखर भगवान कछो रहिस?

दूसर देसन के बीच तोर हरवाहन के खून के बदला लेय के

हमर आंखी कर आगू नियाव हुइ जाय।

11कैदिन के कराहना तोर कान तक पहुंचै,

घात होय बाले के अपन बल के दवारा बचा।

12हे परभु हमर परोसिन के जउन तोर बुराई करे हबै,

ओखर सातगुना बदला उनही दे।

13तब हम जउन तोर परजा अउ तोर चारा के गेडरा हबै,

तोर धन्यबाद हरमेसा करत रहब,

अउ पीढी लग पीढी तक तोर गुडनवाद करत रहिबे।