भजन 78

भगवान अउ ओखर मनसेन

आसाप के मस्कील

1हे मोर मनसे, मोर सिक्छा के सुना,

मोर बचन के पल्ला कान लगावा

2मै अपन मुंह नीतिबचन कहै के निता खोलिहों,

अउ पुरान काल के लुके हर बातन के भेद के अक्ठी किस्सन हे समझाहुं।

3जउन बातन के हम सुने हवन,

अउ जान लयन, अउ हमर बाप दादन हमर लग बरन करे हबै।

4उनही हम उनखर सन्तान लग एकांत नेहको रखै,

पय अगला पीढी के मनसे लग,

यहोबा के गुडनवाद अउ ओखर सक्ति

अउ अदभुत कामन के बरन करे।

5उहै तो याकूब हे अक्ठी चुनउती ठहराय,

अउ इस्राएल हे अक्ठी नियम बनाइस,

जेखर बिसय उहै हमर बाफन के आदेस दइस,

तुम इहै अपन-अपन बाल-बच्चन के गुठे सके।

6आयबाले पीढी कर मनसे, अगर जउन लरका पइदा होय बाले हबै, ओही जाने,

अउ अपन-अपन बाल-बच्चा के सिखाय सकै।

7जेखर लग उन भगवान कर यकीन रखै,

अउ भगवान के बडा कामन के झइ बिसरै,

पय ओखर आदेसन के पालन करत रहै।

8अउ अपन बाप समान झइ होय,

काखे ऊ पीढी के मनसे तो जिद्दी अउ झगडालू रथै,

अउ उनही अपन मन स्थिर नेहको करे रथै

अउ उनखर आतमा भगवान के पल्ला सही नेहको रथै।

9एप्रैमियन मनसे सास्तर धारी अउ धनही धारी होय

पय लडाई के टेम भग गइन।

10उन भगवान के टीमा पूर नेहको करे,

अउ ओखर नियम हे चले लग मना करिस।

11उन ओखर बडे कामन के अउ जउन अदभुत कामन ऊ उनखर आगू करे रथै,

उनके भुलवाय दइस।

12ऊ तउन उनखर बाफ-दादन के

आगू मिस्र देस के सोअन के पटउरा हे चकित काम करे रथै।1

13ऊ समुंदर के दुइ भाग हे बांट दइस,

अउ उनही नका दइस, अउ ऊ जल के ढेर के जसना ठाड कर दइस।2

14ऊ रोज के बादर के खंभा लग

अउ रात भर आगी कर उजियार के दवारा उनखर अगुवाई करिस।3

15ऊ रेगिस्तान हे पटपर के चीरके,

गहीर झिरना लग भरपूर मातरा हे उनके पानी पिलाय रथै।4

16उहै पटपर लग धार निकरे

अउ नदी के जसना जल बहाय।

17तउमा ओखर बिरोध बिदरोह जादा पाप करत गय,

अउ रेगिस्तान देस हे भगवान के बिरोध करत रथै।

18अपन इक्छा के जसना खाना मांग कर

मने मन हे भगवान के परिक्छा करे।

19ऊ भगवान के बिरोध कहै लगिस,

“काखे भगवान रेगिस्तान भुंइ हे मेज लगाय सकथै?

20ऊ पटपर हे मारके पानी बहाय तो दइस,

अउ धाराय उमड चलिस, पय का ऊ रोटी दइ सकथै? का ऊ अपन परजा के निता मांस तइयार कर सकथै?”

21तब यहोबा सुन के गुस्सा लग भर गइस,

तब याकूब के बीच आगी लगिस,

अउ इस्राएल के बिरुध गुस्सा भडकिस।

22इहैनिता कि उनही भगवान हे यकीन नेहको रखथै,

न ओखर उध्दार करै के सक्ति हे यकीन करिस।

23तउमा ऊ आकास के आदेस दइस,

अउ स्वरग के दूरन के खोलिस।

24अउ उनखर निता खाय के मन्ना बरसाय,

अउ उनही स्वरग के दाना दइस।5

25मनसेन के स्वरगदूतन के रोटी मिलिस,

ऊ उनखर बोहत जादा खाना दइस।

26ऊ आकास हे पूरबी दिसन लग हवा के चलाइस,

अउ अपन सक्ति लग दक्छिन हवा बहाइस।

27अउ उनखर निता मांस कुदरा के जसना बोहत बरसाइस,

अउ समुंदर के कुदरा के जसना अनगिनत चिरइया पठोइस।

28अउ उनखर छावनी के बीच हे,

उनखर निवास जिघा के चारो पल्ला गिराथै।

29उन खाय के अघाय हुइ गइन,

अउ ऊ उनखर कामना पूर करिस।

30उनखर काम बने रहै,

उनखर खाना उनखर मुंह हे रथै,

31भगवान कर गुस्सा उनखर बिरुध्द भडक उठिस,

उहै उनखर बलवान डउका के मार डारे,

इस्राएल के सगियान के उहै बिछाय दइस।

32एतका अउ जादा पाप करत गइन,

अउ भगवान के अदभुत कामन हे बिस्वास नेहको करिस।

33तब उहै उनखर रोज के बेकार काम हे,

अउ उनखर सालन के अचानक डराय हे समापत करिस।

34जब ऊ उनखर मसे कुछ के मार डालथै,

ता बाकि मनसे सच्चे मन लग ओखर पल्ला फिरथै,

उन पस्चाताप करत भगवान लग बिनती करथै।

35उनखर सुरता आउत रथै कि भगवान हमर पटपड हबै,

अउ परम परधान भगवान हमर मुकति करै बाले हबै।

36पय उन अपन मुंह लग धोखा दइन,

अउ ओखर लग झूठ बोलथै।

37हे भगवान उनखर हरदय ओखर पल्ला मजबूत नेहको रथै,

ओखर टीमा के बिसय सही रथै।

38पय भगवान दयालु हबै,

ऊ नस्ट नेहको करे,

पय ऊ अधरम के ढांपे हबै,

ऊ बेर-बेर अपन गुस्सा के ठंड करथै,

अउ अपन गुस्सा के फेरै भडकै नेहको दइस।

39उके सुरता रथै, कि हइ नासवान हबै, हइ हवा के जसना हबै,

जउन चलै जथै अउ लउट के नेहको आथै।

40उनही केतका बार पतेरा हे ओखर लग दंगा फसाद करिस,

अउ बिना पानी के देस हे उके निरास करिस।

41ऊ बेर-बेर भगवान के परिक्छा करथै,

अउ इस्राएल के पवितर के पस्चताथै।

42उनही तउन बांह स्मरन करे,

ऊ रोज जब ऊ उनखर दुस्मन के हाथ लग छंडाय रथै।

43कि ऊ कसना अपन चिन्हा मिस्र देस हे,

अउ अपन चमतकार सोअन के इलाका हे करथै।

44ऊ तउन मिस्र देस के नदिया के धारन के खून हे बदल डालिस,

अउ अपन नदियन के पानी पीय नेहको सकिस।

45ऊ उनखर बीच हे डांस माछिन के पठोइस, जउन उनही काट खाइस,

अउ मेचका पठोइस जिहां उनके बोहत सताइस।

46ऊ उनखर भुंइ के फसल के किरवा

अउ उनखर खेतबारी के फसल के चिड्डा नास कर दय रथै।

47ऊ उनखर अंगूर के बगिया के ओर पथरा लग

अउ उनखर ऊमर कर रूखन के बडका-बडका पथरा बरसाय के नस्ट करिस।

48ऊ उनखर पसु के ओर पथरा लग,

अउ उनखर गेडरा-छेडी के बिजली लग मार डारिस।

49ऊ उनखर उप्पर अपन जादा गुस्सा भडकाथै,

अउ उनके समस्या हे डालथै,

अउ समस्या डालै बाले दूतन के दल पठोइस।

50ऊ अपन गुस्सा के गली खोलिस,

अउ उनखर परानन के मिरतू लग न बचाय

पय उनखर महारोग के कबजा हे कर दइस।

51उहै मिस्र के सगलू पहिलाउठन के मारिन,

जउन हाम के तम्बू हे डउका के पहिले फल रथै।6

52पय अपन कुल के मनसेन के गेडरा-छेडिन के जसना बाहिर निकाडिस,

अउ पतेरा हे उनखर अगुवाई करके गली दिखाइस।7

53ता ऊ उनही सुरक्छित रूप लग लइ गइन,

पय डर नेहको हुइस, पय उनखर बैरी समुन्दर हे बुड गइन।8

54तब ऊ उनही अपन पवितर भुंइ हे,

इहै डोंगर हे लइ आइस, जसना ऊ अपन दहिना हाथ लग पाय रथै।

55ऊ उनखर चीज लग गैर यहूदी के भगाय दइस,

अउ उनखर भुंइ के डोरा लग नाप-नापके बांट दइस,

अउ इस्राएल के कुरन के उनखर डेरा हे बसाइस।9

56तउमा उन परमपरधान भगवान के परिक्छा करिस

अउ ओखर लग बलवा करिस,

अउ ओखर आदेस के नेहको मानिस।

57अउ मुडके अपन पुरखन के जसना बिदरोही अउ बिस्वासघाती रथै,

ऊ धोखा देय बाले धनही के जसना रथै।

58काखे उन ऊंच जिघा बनाय के उके गुस्सा दिलाथै,

अउ खोदे हर मूरतिन के दवारा ओहमा लग बुराई पइदा करथै।

59भगवान सुन के गुस्सा लग भर गइस,

अउ ऊ इस्राएल मनसे के बिलकुन असुइकार कर दइस।

60ऊ सिलोह के अपन निवास जिघा,

मतलब ऊ तम्बू के जउन मनसेन के बीच ठाड करे रथै, छांड दइस।10

61अउ ऊ हमर बैरिन के, अपन टीमा के संदूक हे बन्दी करै के अनुमति दइ दइस,

जउन ओखर सक्ति अउ महिमा के चिन्हा रथै।11

62ऊ अपन परजा के मनसेन के तलबार लग मरवाय दइस,

अउ ऊ अपन निज भाग के बिरुध्द गुस्सा लग भर गइस।

63उनखर सगियान लडाई हे मारे गइन,

अउ उनखर जबान टोरिया कुंवारी रह गइन।

64उनखर पुजारी तलबार लग मारे गय,

अउ उनखर बिधवा रोमै नेहको पाइन।

65तब परभु माना नीद लग जाग उठिस, अउ असना बीर के जसना उठिस,

जउन अंगूर के रस पीके ललकारे हबै।

66ऊ अपन बैरिन के मार के पाछू हटाय दइस,

अउ उनखर सदा के नामधराई हार हुइस।

67फेर ऊ यूसुफ के तम्बू के छांड दइस,

अउ एप्रैम के कुरन के नेहको चुनिस।

68पय यहूदा के कुर के

अउ अपन पिरिया सिय्योन डोंगर के चुन लइस।

69ऊ अपन पवितर जघा के

बोहत ऊंच बनाय दइस,

अउ भुंइ के जसना ठाड बनाय,

जेखर नीह ऊ सदा के निता डारे हबै।

70फेर ऊ अपन हरवाह दाऊद के

चुन के सार हे लग लइ लइस।12

71जिहां ऊ अपन दूध पियामै बाले गेडरन के झुन्डन के देखरेख करिस,

अउ ऊ याकूब के इस्राएल कर राजा,

भगवान के मनसेन के बरेदिया बनाइस।

72ता ऊ सुध्द मन लग उनखर चरवाही करिस,

अउ अपन हाथ के कुसलता लग उनखर अगुवाई करिस।