भजन 77

समस्या कर टेम धीर

परधान बजामै बाले कर निता: यदूतून कर राग हे, आसाप कर भजन।

1मै भगवान के दुहाई चिल्लाय-चिल्लाय के देहूं,

मै भगवान के दुहाई देहूं, अउ ऊ मोर बिनती कान लगायके सुन लेही।

2संकट के रोज मै परभु के खोज हे लगे रथो,

सगलू रात के मोर हाथ फइले रहिस,

पय मोके आराम नेहको मिलिस।

3मै भगवान के सुरता कर के कराहथो,

मै चिन्ता करत-करत बिहोस हुइ गयो।

4हे भगवान मै एतका घबराय गयों,

कि मोर मुंह लग बात नेहको निकडथै।

5मै पुरान दिनन के,

अउ जुग-जुग कर सालन के सोचे हबै।

6मै रात के टेम अपन गाना के सुरता करथों, अउ मै अपन मन हे धियान करथों,

अउ मोर आतमा मेहनत लग खोजथै।

7“परभु हरमेसा के निता छांड देही का?

अउ फेर कबहुन दया नेहको करही?

8का ओखर करुना हरमेसा के निता मिट गइस,

का ओखर टीमा पुरखा-पुरखा कर निता निस्फल हुइ गय हबै?

9का भगवान अनुगरह करै के बिसर गइस?

ऊ गुस्सा करके अपन सगलू दया के रोक रखे हबै?”

10मै कथो, “इहै तो मोर दुख हबै,

कि परमपरधान के खउनी हाथ बदल गय हबै।”

11मै यहोबा कर बडा कामन के चरचा करहुं,

निस्चित मै तोर पुरानदिन बाले चकित कामन के सुरता करहुं।

12मै तोर सगलू कामन हे धियान करहुं,

अउ तोर बडा कामन के सोचहुं।

13हे भगवान तोर गली पवितर हबै,

कउन देउता भगवान के बरोबर बडा हबै?

14चकित काम करै बाले भगवान तहिन हबस,

तै राज-राज के मनसेन हे अपन सक्ति परगट करे हबस।

15तै अपन सक्ति लग अपन परजा याकूब

अउ यूसुफ के वंसज के छंडाय लय हबस।

16हे भगवान, पानी तोके देखिस, पानी तोके देख के डराय गइस,

गहीड पानी थरराय उठिस।

17बादर लग बडी बरसा हुइस,

आकास लग गरज के संग बारिस हुइस,

अउ सगलू दिसन हे बिजली चमकै लगिस।

18बडेरा हे तोर गरजै के सब्द सुनाई पडथै,

दुनिया बिजली लग उजियार हुइस,

भुंइ थरथराय अउ डोल गइस।

19तोर रास्ता समुंदर हे हबै,

अउ तोर रास्ता गहीड जल हे हुइस,

पय तुम्हर गोडन के चिन्हा दिखाई नेहको पडिस।

20तै मूसा अउ हारुन के दवारा अपन परजा कर अगुवाई

गेडरन के झुन्ड के मेर रखबाली करे।