Bhumiya
भजन 7
नियाव कर निता बिनती
दाऊद के सिग्गायोन नाम के भजन जउन ऊ बिन्यामीनी कूस के बातन के कारन यहोबा कर आगू गाइस
परभु मोर भगवान मै तोर सरन हे आय हबो,
मोर पाछू करे बालेन लग बचा, उनखर लग मुक्त कर।
असना होय कि बाघ के जसना मोके पकड ले,
मोके फारके खंडा-खंडा करै अउ मोके बचामै बाले
कउनो नेहको होय।
परभु मोर भगवान, अगर मै हइ करे हबा,
अगर मोर हाथ लग अधरम हुइस,
अगर मै अपन संगी लग बदला हे बुराई करो
अउ अपन बैरी के बिना कारन के लूटो,
ता बैरी मोर परान कर पीछा करके मोके आय पकडिन
अउ मोर परान के भुंइ हे कचरिन
अउ मोके बेज्जति करके माटी हे मिलाय दइन।
हे यहोबा अपन गुस्सा हे उठ गुस्सा लग भरे
मोर सताय बाले के बिरुध्द तै ठाड हुइ जा,
मोर निता जाग,
तै नियाव के आदेस दइ दय हबस।
देस-देस कर मनसे तोर चारो पल्ला अकजुट होय हबै
तै फेरै लग उनखर उप्पर उपस्थित होय।
यहोबा राज-राज कर नियाव करथै,
यहोबा मोर नियाइपन
अउ खराई कर जसना मोर नियाव चुकाय दे।
भला होय कि दुस्टता के बुराई के अन्त हुइ जाय
पय नेक मनसे के तै स्थिर कर।
काखे नेक मनसे भगवान मन
अउ अन्तरयामी कर ग्याता हबै।
मोर ढाल भगवान कर हाथ हे हबै,
ऊ सीधा मन बालेन के बचाथै।
भगवान नेक अउ नियाई हबै,
पय असना भगवान हबै जउन रोज दिन गुस्सा करथै।
अगर मनसे मन झइ फिरामै
ता ऊ अपन तलबार टेही,
अउ युध्द कर निता अपन धनही तइयार करही।
अउ ऊ मनसे कर निता ऊ मिरतू कर
हथियार तइयार कर लय हबै।
देखा दुस्ट मनसे कसना बेकार बात सोंचथै,
लडाई झगडा कर जुगाड बनाथै अउ छल करथै।
ऊ गडहा खोदके ओही गहिड करिस,
अउ जउन खाही ऊ बनाय रथै, ओहमा ऊ खुदै गिरिस।
ओखर उत्पात पलटके ओखरै मूंड हे पडही
अउ ओखर समस्या उहै के लिलार हे पडही।
मै यहोबा कर धरम कर जसना ओखर धन्यबाद करिहों,
अउ परम परधान यहोबा कर नाम कर भजन गाहुं।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.