भजन 64

लुकेहर बैरिन लग रक्छा के निता बिनती

परधान बजामै बाले कर निता दाऊद कर भजन

1हे भगवान, जब मै तोर दुहाई दे, तब मोर सुन,

बैरी के दवारा बनाय हर भय के टेम मोर परान के रक्छा कर।

2कुकरमिन के सलाह लग,

अउ अनर्थकारी के हुल्लड लग मोर आड होय।

3उन अपन जीभ के तलबार कर जसना तेज करे हबै,

अउ अपन करू बचन के तीरन के चढाय हबै,

4ताकि लुकके सीधा मनसे के मारै,

ऊ निडर हुइके ओही अचनकै मारथै।

5उन बेकार काम करै के हिम्मत बांधथै।

उन फांदा लगामै के बिसय बातचीत करथै,

अउ कथै, हम के कउन देखही?

6ऊ बइमान मनसे कर युक्ति निकालथै,

अउ कथै, हम पक्की युक्ति खोजके निकाडे हबै।

काखे मनसे कर मन अउ हिरदय बोहत गहिड हबै।

7पय भगवान उनखर उप्पर तीर चलाही,

उन अचनकै घायल हुइ जइहिन।

8ऊ अपन बचन के कारन ठोकर खायके गिर पडहिन,

जेतका उनखर उप्पर नजर डलहिन ऊ सगलू अपन-अपन मूंड हिलइहिन।

9तब सगलू मनसे डर जइहिन

अउ भगवान कर कामन के बखान करहिन

अउ ओखर कामन के अच्छी मेर समझहिन।

10धरमी यहोबा कर कारन खुसी हुइके

ओखर सरनगत होही

अउ सगलू सीधा मनबाले बडाई करहिन।