भजन 63

पियास मन भगवान हे अघइहिन

दाऊद कर भजन, जब ऊ यहूदा कर निरजल परदेस हे रथै।

1हे भगवान, तै मोर भगवान हबस,

मै तोके परयास लग खोजहुं,

सुखाय अउ बेगर पानी के भुंइ हे,

मोर मन तोर पियास हबै, मोर देह तोर

बोहत अभिलासी हबै।

2हइ मेर लग मै पवितरजिघा हे तोर हे नजर करेव,

कि तोर सक्ति अउ महिमा के देखों।

3काखे तोर करुना जीवन लग अच्छा हबै,

मै तोर बडाई करिहों।

4हइमेर मै जीवन भर तोके धन्य कहत रइहों,

अउ तोर नाम लइके अपन हाथ उठाहुं।

5मोर जीव माना चरबी अउ चीकन खाना लग अघाय जही,

अउ मै जयजयकार करके तोर बडाई करिहों

6जब मै जेठना हे पडों तोर सुरता करिहों,

तब रात कर अक-अक पहर हे तोर उप्पर धियान करिहों,

7काखे तै मोर सहायक बने हबस,

इहैनिता मै तोर पंखन कर छाया हे जयजयकार करिहों।

8मोर मन तोर पाछु-पाछु लगे चलथै,

अउ मोके तै अपन दाहिना हाथ लग थाम रखथस।

9पय जउन मोर परान कर खोजइया हबै,

ऊ भुंइ कर तरी जिघन हे जा पडहिन,

10ऊ तलबार लग मारे जइहिन

अउ बिगवा के खाना हुइ जइहिन।

11पय राजा भगवान कर कारन खुस होही,

जउन कउ ओखर किरिया खाही, ऊ बडाई करै पाही,

पय ठगरा बोलैबाले कर मुंह बंद करे जही।