Bhumiya
भजन 62
भगवान सिबाय गढ
परधान बजामै बाले दाऊद कर निता, यदूतून कर राग हे
सहीमा मै चुपचाप धीरज धरके भगवान कर पल्ला मन लगाय हव,
मोर मुकति ओखरै लग होथै।
सहीमा उहै, मोर चट्टान
अउ मोर मुकति हबै,
ऊ मोर गढ हबै, मै जादा न हिलहों।
तुम कब तक अक डउका हे हमला करत रइहिन, कि सगलू मिलके
ओखर घात करा? ऊ तो झुके हर भीत या गिरत बाडे कर जसना हबै।
सहीमा ऊ उके, ओखर ऊंच पद लग
गिरामै के सम्मति करत हबै,
ऊ ठगरा लग खुस रथै।
मुंह लग तो ऊ आसीस देतों पय मन हे कोसथै।
हे मोर मन, भगवान कर आगू सुख सांति पाबा,
काखे मोर आसरा उहै लग हबै।
सहीमा उहै मोर चट्टान अउ मोर मुकति हबै,
ऊ मोर गढ हबै,
इहैनिता मै नेहको हिलहों।
मोर मुकति अउ मोर महिमा के आधार भगवान हबै,
मोर मजबूत चट्टान
अउ मोर गढ भगवान हबै।
हे मनसे, हर टेम ओखर उप्पर बिस्वास रखा,
ओखर लग अपन-अपन मन कर बात खोलके कहा,
भगवान हमर गढ हबै।
साधारन मनसे हवा के झोकन कर जसना हबै,
अउ बडा मनसे ठगरा हबै,
तउल हे उन हल्का निकडत हबै,
उन सगलू के सगलू सांस लग हल्का हबै।
अतियाचार करै हे बिस्वास झइ रखा
अउ लूट मार करै हे झइ फूला,
चाहे डेरा सम्पत्ति बढै, तउभरमा
ओखर उप्पर मन झइ लगइहा।
भगवान अक बेर कहे हबै, अउ दुइ बेर मै हइ सुने हव,
कि सकति भगवान के हबै
अउ हे परभु, करुना तोरै हबै।
काखे तै अक-अक जन के ओखर काम कर जसना फल देथै।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.