भजन 61

रक्छा कर निता बिनती

परधान बजामै बाले कर निता, तारबाले बाजा कर संग दाऊद कर भजन

1हे भगवान, मोर आरो के सुन,

मोर बिनती के पल्ला धियान दे।

2मुरझाय टेम मै भुंइ कर छोर लग तोके गोहरइहों,

जउन चट्टान मोर निता ऊंच हबै, ओखर उप्पर मोके लइ चल,

3काखे तै मोर गढ हबस,

अउ बैरी लग बचै कर निता ऊंच गढ हबै।

4मै तोर तम्बू हे जुगजुग बने रइहों।

मै तोर पोखडी के आड हे सरन लय रइहों।

5काखे हे भगवान, तै मोर मन्नत के सुनिस,

जउन तोर नाम के भय मानथै, उनखर भाग तै मोके दय हबस।

6तै राजा कर आयु के बोहत बढाही,

ओखर साल पीढी-पीढी के जसना होही।

7ऊ भगवान कर लिघ्घो हरमेसा बने रही,

तै अपन करुना अउ सच्चाई के ओखर रक्छा कर निता ठहराय रख।

8हइ मेर मै हरमेसा तोर नाम के भजन गायके

अपन मन्नत हर रोज पूर करे करिहों।