Bhumiya
भजन 51
पाप छमा कर निता बिनती
परधान बजामै बाले के निता दाऊद कर भजन, जब नातान नबी ओखर लिघ्घो इहैनिता आइस, कि ऊ बतसेबा कर लिघ्घो गय रथै
हे भगवान अपन करुना के जसना
मोर हे अनुगरह कर,
अपन बडी दया के जसना मोर अपराधन
के मिटाय दे।
मोके भली भांति धोयके मोर अधरम दुरिहा कर,
अउ मोर पाप लग छंडायके मोके सुध्द कर,
मै तो अपन अपराधन के जानथों,
अउ मोर पाप लगेतार मोर नजर हे रथै।
मै सिबाय तोर बिरुध्द पाप करे हबो,
अउ जउन तोर नजर हे बेकार हबै, उहै करे हव,
ताकि तै बोलै महिन नेक
अउ नियाव करै महिन निरदोस ठहरे।
देख मै अधरम के संग पइदा होयों,
अउ पाप के संग अपन दाय के लादा महिन पडेव।
देख तै हिरदय के सच्चाई लग मगन होथस,
अउ मोर मन हे ग्यान सिखाबे।
जूफा कर पउधा लग मोके सुध्द कर, ता मै पवितर हुइ जहुं,
मोके धो अउ मै बरफ लग जादा चरका बनहूं।
मोके खुसी अउ मगन कर बात सुना,
जेखर लग जउन हाडा तै टोर डारे हबस,
उन खुस हुइ जाय।
अपन मुंह मोर पाप के पल्ला लग फेर ले,
अउ मोर सगलू अधरम के कामन के मिटाय डार।
हे भगवान, मोर भित्तर सुध्द मन पइदा कर,
अउ मोर भित्तर स्थिर आतमा नबा सिरे लग पइदा कर।
मोके अपन उपस्थित लग निकार झइ दे,
अउ अपन पवितर आतमा मोर लग अलगे झइ कर।
अपन करे हर मुकति के खुसी मोके फेरै लग दे,
अउ मुकति कर आतमा दइके मोके सम्हार।
तब मै अपराधिन के तोर रास्ता सिखाहूं,
अउ पापी तोर पल्ला फिरहीं।
हे भगवान, हे मोर मुकति करै बाले भगवान,
मोके हतिया के अपराध लग छंडाय ले,
तब तोर धरम कर जयजयकार करै पइहों।
हे परभु, मोर मुंह उघार दे,
तब तोर गुनगान कर सकिहों।
काखे तै पसुबलि लग मगन नेहको होथस,
नेहको ता मै देतों,
आगीबलि लग तै मगन नेहको होथस।
टूटे मन भगवान के योग बलिदान हबै,
हे भगवान तै टूटे अउ पिसे हर मन के बेकार नेहको जानथस।
मगन हुइके सिय्योन कर भलाई कर,
यरुसलेम के किले के भीठी के तै बना,
तब तै धरम कर बलिदानन लग मतलब सगलू
पसुन के आग कर बलि लग खुस होही,
तब मनसेन तोर बेदी हे बोकडा चढइहिन।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.