भजन 50

सही आराधना

आसाप कर भजन

1सर्वसक्तिमान भगवान यहोबा कथै,

पूरब लग लइके पस्चिम तक भुंइ कर मनसेन के बुलाय हबै।

2सिय्योन लग, जउन बोहत सुन्दर हबै,

भगवान अपन उजियार दिखाय हबै।

3हमर भगवान आही अउ चुपचाप नेहको रही,

आगी ओखर आगू-आगू भसम करत जही,

अउ ओखर चउगिरदा पल्ला बडा आंधी चलही।

4ऊ अपन मनसेन के नियाव करै के निता उप्पर के आकास के

अउ भुंइ के पुकारही,

5“मोर बिस्वासओग मनसेन के मोर लिघ्घो अकजिघा करा,

जउन बलिदान चढायके मोर लग टीमा बांधे हबै।”

6स्वरग ओखर नेक होय कर परचार करी,

काखे भगवान तो नियाव करै बाले हबै।

7“हे मोर मनसेन, सुन मै बोलथों,

अउ हे इस्राएल तोर बारे गवाही देथों।

भगवान तोर भगवान महिन हव।”

8मै तोर हे तोर पसुबलिन कर बारे हे दोस नेहको लगाथों,

तोर आगीबलि तो लगेतार मोर निता चढथै।

9मै न तो तोर घर ले बइला

न तोर सार लग बोकडा लइहों।

10काखे पतेरा कर सगलू जीव जन्तु,

अउ हजारन डोंगर कर बनपसु मोरेन आय।

11डोंगरन कर सगलू चिरइयन के मै जानथों,

अउ पटउरा हे चलै फिरै बाले जानबर मोरेन आय।

12“अगर मै भुखाय हर रहतों ता तोर लग नेहको कथों काखे दुनिया

अउ जउन कुछ ओहमा हबै ऊ मोर आय।

13का मै बइला कर गोस खांव,

या बोकडन कर खून पियों?

14भगवान के धन्यबाद कर बलिदान चढा,

अउ परमपरधान कर निता अपन मन्नत पूर कर,

15अउ मुसीबत के रोज मोके गोहरा,

मै तोके छंडाहुं,

अउ तै मोर बडाई करैके पइहा।”

16पय दुस्ट लग भगवान कथै,

तोके मोर नियम के वरनन करै लग काहिन काम?

तै मोर टीमा कर चरचा काखे करथस?

17तै तो सिक्छा लग बैर करथस,

अउ मोर वचन के बेकार जानथस।

18जब तै चोरटा के देखे, तब ओखर संगति लग खुस हुइस,

अउ गलत काम करैबाले के संग संगी होय हबस।

19तै अपन मुंह बुराई करै के निता खोले,

अउ तोर का जीभ धोखा बात गढथै।

20तै बइठे हर अपन भाई कर बिरुद्ध बोलथस,

अउ अपन सगा भाई कर बुराई करथस।

21हइ काम तहिन करे, अउ मै चुप रहो,

इहैनिता तै समझ लय कि भगवान बिलकुन मोर जसना हबै।

पय मै तोके समझाहुं,

अउ तोर आंखिन कर आगू सगलू कुछ

अलगे-अलगे दिखाहुं।

22हे भगवान के बिसरैबाले, हइ बात भली भांति समझ लेया,

कहुं असना झइ होय कि मै तुमके फाड डारों खंडा-खंडा कर डालों,

अउ कउनो छंडामैबाले नेहको होय।

23धन्यबाद कर बलिदान के चढामैबाले मोर बडाई करथै,

अउ जउन अपन आचरन रखथै उके मै भगवान के करे हर मुकति दिखाहुं।