भजन 43

नियाय अउ मुकति कर निता बिनती

भजन 42 कर बांकी भाग

1हे भगवान, मोर नियाव चुकिस

अउ बिधरमी राज लग मोर मुकदमा लड,

मोके ठगिस अउ बेइमान डउका लग बचा।

2काखे हे भगवान, तै मोर सरन हबै,

तै काखे मोके छांड दय हबै?

मै बैरी के सताव के मारे दुख के

पहिराबा पहिरे हर काखे फिरत रहो?

3अपन उजियार अउ अपन सच्चाई के पठोय, उन मोर अगुवाई करे,

उन मोके तोर पवितर डोंगर

अउ तोर निबास जिघा हे पहुंचाय।

4तब मै भगवान के बेदी कर लिघ्घो जहुं,

जउन मोर लिघ्घो खुसी कर सुरोत हबै,

अउ हे भगवान, हे मोर भगवान,

मै बीडा बजाय-बजाय के तोर धन्यबाद करहुं।

5हे मोर परान, तै काखे गिराय जथै?

तै भित्तरै-भित्तर काखे बेजुंग हबै?

भगवान हे भरोसा रख,

काखे ऊ मोर मुंह कर चमक मोर भगवान हबै,

मै फेर ओखर धन्यबाद करिहों।