Bhumiya
भजन 44
सुरक्छा कर निता बिनती
खासवादक कर निता कोरह वंसिन के अक्ठी मसकील
हे भगवान, हम अपन का कानन लग सुना,
हमर बाफ-दादन लग बिस्तार करे हबै,
कि तै उनखर रोज अउ पुरानरोज हे
काहिन-काहिन काम करे हबै।
तै अपन हाथ लग राज के निकार दइस,
अउ इनके बसाइस,
तै राज-राज के मनसेन के दुख दइस,
अउ इनही चारो पल्ला फइलाय दइस,
काखे उन न अपन तलबार के बल लग हइ देस कर साहब हुइस,
अउ न अपन बलवान लग तोर खउनी हाथ
अउ तोर भुजा अउ तोर खुस मुंह के कारन जयवन्त हुइस,
काखे तै उके चाहथस।
हे भगवान, तै हमर का महाराजा हबै,
तै याकूब के मुकति के आदेस देथस।
तोर सहारा हम अपन बैरिन के ढकेल कर गिराय दइबे,
तोर नाम के परताप लग हम अपन बिरोधिन के कचरब।
काखे मै अपन धनही हे भरोसा नेहको रखहुं,
अउ न अपन तलबार के बल लग बचहुं।
पय तै हमके बैरिन लग बचाय हबै,
अउ हमर बैरिन के निरास अउ बेज्जति करे हबै।
हम भगवान के बडाई दिन भर करत रथै,
अउ हरमेसा तोर नाम कर धन्यबाद करत रहिबे।
तउभरमा तै अब हमके छांड दय अउ हमर बेज्जति करे हबस,
अउ हमर दलन के संग आगू नेहको जथस।
तै हमके बैरी कर आगू लग हटाय दे,
अउ हमर बैरी मनमाना लूटमार करथै।
तै हमके कसाई के गेडरन के जसना कर दय हबस,
अउ हमके दूसर राज हे इछो-उछो करे हबस।
तै अपन मनसेन के सेतमेत बिकन डालथस,
पय उनखर कीमत लग तै धनी नेहको होथस।
तै हमर परोसिन हे हमर नामधराई कराथस,
अउ हमर चारो पल्ला के रहैबाले हमर लग हंसी ठट्ठा उडाथै।
तै हमके दूसर राज-राज कर बीच हे मजाक ठहराइस,
अउ देस-देस के मनसे हमर कारन मूंड हिलाथै।
दिन भर हमके बेज्जति सहै के पडथै, दाग लगामै
अउ बुराई करैबाले के आरो लग,
बैरी अउ बदला लयबालेन के कारन, बुरा-भला कहैबाले
अउ बुराई करैबालेन के कारन।
हइ सगलू कुछ हमर हे गुजरिस तउभरमा हम तोके नेहको बिसरन,
न तोर टीमा कर बारे हे बिस्वासघात करे हबन।
हमर मन नेहको बहकिस,
न हमर गोड तोर रास्ता लग मुडै,
तउभरमा तै हमके सिकटन कर जिघा हे पीस डारे,
अउ हमके घोर अंधियार हे लुकोय दय हबै।
अगर हम अपन भगवान कर नाम बिसर जथन,
अगर कउनो पराय देउता कर पल्ला अपन हाथ फइलाथन,
ता का भगवान एखर बिचार नेहको करथै?
काखे ऊ तो मन कर गुप्त बातन के जानथै।
पय हम दिनभर तोर खातिर मार डारे जथन,
अउ उन गेडरन के जसना समझ जथै, जउन बलि होय हबै।
हे परभु, जाग तै काखे सोथस?
उठ हमके हरमेसा के निता झइ छांड दे।
तै काखे अपन मुंह लुकोय लेथस?
अउ हमर दुख अउ सताय जायके बिसर जथस?
हमर परान माटी लग,
लग गइस हमर लादा भुंइ लग सट गय हबै।
हमर सहयोग कर निता उठ ठाड हो,
अउ अपन करुना के खातिर हमके छंडाय ले।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.