भजन 42

दूसर भाग

निरवासित मनसे कर बिनती

(भजन 42—72)

परधान बजायबाले के निता कोरह वंसियन के मस्कील

1जसना छिगरी नदिया कर पानी के निता हांफथै, ओसनेन,

हे भगवान, मै तोर निता हांफथो।

2जिंदा भगवान, हां भगवान कर मै पियास हव,

मै कब जाय के भगवान के अपन मुंह दिखाहुं?

3मोर आंसू रोज अउ रात मोर खाना हुइस,

अउ मनसे दिन भर मोर लग कहथै रथै,

“तोर भगवान कछो हबै?”

4हइ याद करके मोर परान दुख हुइ जथै,

कि मै कसना भीड के संग जाय करथो,

मै जयजयकार अउ धन्यबाद कर संग तेउहार बनामै बाले भीड कर बीच हे

भगवान के भवन हे धीरे-धीरे जाय करथै।

5हे मोर परान, तै काखे गिराय जाथै?

तै भित्तर-भित्तर काखे बइजुंग हबै?

भगवान हे आसरा लगाय रह,

काखे मै ओखर दरसन लग मुकति पाय के

फेर ओखर धन्यबाद करहुं।

6हे मोर भगवान मोर परान मोर भित्तर गिराय जाथै,

इहैनिता मै यरदन के लिघ्घो कर देस लग

अउ हेर्मोन के डोंगरन अउ मिसगार डोंगर के उप्पर लग

तोके याद करथो।

7तोर जलधारन के सब्द सुन कर पानी-पानी गोहराथै,

तोर सगलू लहर अउ हिलोर हे मै बुड गयो।

8तउभरमा रोज के भगवान अपन सक्ति अउ करुना परगट करही,

अउ रात के मै ओखर गाना गाहुं,

अउ अपन जीवनदाता भगवान लग बिनती करहुं।

9मै भगवान लग जउन मोर पटपड हबै कइहों,

“तै मोके बिसर गय? मै बैरी के अंधियार कर मारे

काखे दुख कर पहिनावा पहिरे हर चलथो फिरथो?”

10मोर सतामैबाले जउन मोर बुराई करथै,

मानो उनखर लग मोर हाडा खंडा-खंडा होथै, मानो कटार छेदर जथै,

काखे उन दिन भर मोर लग कहत रथै, “तोर भगवान कछो हबै?”

11हे मोर परान, तै काखे गिराय जथै?

तै भित्तरै-भित्तर काखे बेजुंग हबै?

भगवान हे भरोसा रख, काखे ऊ मोर मुंह कर

चमक अउ मोर भगवान हबै,

मै फेर ओखर धन्यबाद करहुं।