भजन 41

नंगहा मनसे कर बिनती

परधान बजामैबाले कर निता दाऊद कर भजन।

1धन्य हबै ऊ मनसे, जउन गरीब कर सुधि रखथै,

परभु समस्या कर रोज उके बचाही।

2यहोबा ओखर मदत करी, अउ उके जिन्दा रखी,

अउ ऊ भुंइ हे धन्य होही,

परभु तै उके ओखर बैरी कर इक्छा हे नेहको छांडहे।

3परभु तै रोग सहै के सहारा देथस, तै ओखर सगलू रोगन के दुरिहां करथस,

अउ तै ओखर जठना के उलट के निक्खा करहे।

4मै कथो, हे यहोबा, मोर हे अनुगरह कर, मोके चंगा कर,

काखे मै तोर बिरुध्द पाप करे हव।

5मोर बैरी हइ कहिके मोर बुराई करथै,

“ऊ कब मरी, अउ ओखर नाम कब मिटी।”

6जउन मोके देखै आथै, ऊ बेकार बात बोलथै,

ओखर मन अपन भित्तर अधरम के बात जमा करथै,

अउ ऊ बाहिर जायके मनसेन लग कहत फिरथै।

7मोर सगलू बैरी मिलके मोर बिरुध्द कानाफूसी करथै,

ऊ मोर बिरुध्द हुइके मोर नुसकान के उपाय करथै।

8उन कथै, इके कउनो बेकार नांगा लग गय हबै, अब जउन हइ पडे हबै,

ता फेरै कबहुन नेहको उठ सकी।

9मोर पिरिया संगी जेखर हे मै यकीन रखथों,

जउन मोर रोटी खाथै,

ऊ मोर बिरुध्द लात उठाय हबै।

10पय हे यहोबा तै मोर हे अनुगरह करके मोके उठा,

कि मै उनके बदला दो।

11तब मै जनिहों कि तै मोर लग मगन हवस,

मोर बैरी मोर बिरुध्द जयवंत नेहको कर पाही।

12मोके तै खराई हे सम्हारथस,

अउ हरमेसा के निता अपन आगू स्थिर करथस।

13इस्राएल कर भगवान यहोबा सुरू लग अनन्तकाल तक धन्य हबै,

ओसनेन होय, अउ ओसनेन होय।