भजन 40

स्तुति कर अक्ठी गीत

परधान बजामैबाले कर निता दाऊद के भजन।

1मै धीर लग यहोबा के ओरगथों, अउ ऊ मोर पल्ला झुकके मोर आरो सुनिस,

अउ मोर मदत करिस।

2ऊ मोके सत्यानास कर खोदरा

अउ चिखला कर बोदा लग उबारे हबै,

अउ मोके पथरा हे ठाड करके

मोर गोडन के मजबूत करे हबै।

3ऊ मोके अक्ठी नबा गीत सिखाइस

जउन हमर भगवान कर स्तुति के हबै,

बोहत झन हइ देख के डरहिन,

अउ यहोबा हे यकीन करहिन।

4धन्य हबै ऊ मनसे जउन परभु हे यकीन करथै,

जउन अभिमानिन के मुंह नेहको ताकथै,

जउन झूठ के भजन करै बाले के संग नेहको देथै।

5हे मोर भगवान यहोबा तै बोहत लग काम करे हवस,

जउन चकित के काम अउ कल्पना तै हमर निता करथस,

ऊ बोहत हबै, तोर जसना कोनो नेहको,

मै तो चाहथो कि खोलके उनखर चरचा करिहों,

पय उनखर गिनती नेहको हुइ सकथै।

6पसुबलि अउ दानाबलि लग तै मगन नेहको होथस,

तै मोर कान खोदके खोले हवस,

आग कर बलि अउ पापबलि तै नेहको चाहे।

7ता मै कथों, देख मै आय हव,

काखे किताब हे मोर बारे हे असना लिखे हर हबै।

8हे मोर भगवान मै तोर इक्छा पूर करै लग मगन हबो,

अउ तोर नियम मोर हिरदय हे बसे हबै।

9मै बडी दरबार हे नेक के सुभ संदेस कर परचार करे हबो,

देख मै अपन मुंह बन्द नेहको करेव,

हे यहोबा, तै इके जानथस।

10मै तोर नेक मन हे नेहको रखों,

मै तोर सच्चाई अउ तोर करे हर मुकति के चरचा करे हव,

मै तोर करुना अउ सत्यता बडी सभा लग

गुप्त नेहको रखब।

11हे यहोबा, तहुं अपन बडी दया मोर उप्पर लग नेहको हटाय ले,

तोर करुना अउ सही लग लगेतार मोर रक्छा होत रहै।

सहायता कर निता बिनती

12काखे मै अनगिनत बुराइयन लग घिरे हर हव,

मोर अधरम के काम मोके आय पकडिस अउ मै नजर नेहको उठाय सकथो,

ऊ गिनती हे मोर मूंड कर चूंदी लग जादा हबै,

इहैनिता मोर हिरदय टूट गइस।

13हे यहोबा, किरपा करके मोके छंडाय ले, हे यहोबा, मोर सहायता करै के निता हरबी कर।

14जउन मोर परान के खोज हे हबै,

ऊ सगलू लज्जित होय अउ उनखर मुंह करिया होय,

अउ ऊ पाछु हटाय अउ बेज्जति करे जाय,

जउन मोर हानि लग खुस होथै।

15जउन मोर, “मजाक उडाथै,” कथै,

ऊ अपन लज्जा के मारे चकित होय।

16पय जेतका तोके खोजथै, ऊ सगलू तोर कारन मगन अउ खुस होय,

जउन तोर करे हर मुकति चाहथै,

ऊ लगेतार कहत रहै,

“यहोबा कर बडाई होय।”

17मै तो दीन अउ गरीब हव,

तउभरमा परभु मोर चिन्ता करथै,

तै मोर सहायक अउ छंडामै बाले हबै,

हे मोर भगवान, देरी झइ कर।