भजन 38

पीडित मनसे कर बिनती

सुरता कर निता दाऊद कर भजन

1हे यहोबा, गुस्सा हे आय के मोके डांट नेहको देय, अउ जलजलाहट हे आय के मोर सजा कर,

2काखे तोर तीर मोर हे लगे हबै,

अउ मै तोर हाथ के तरी दबे हव।

3तोर गुस्सा लग मै बोहत पीरा हे हव,

मोर पापन के कारन मोर सगलू देह रोगी हुइ गय हबै।

4काखे मोर अधरम के कामन हे मोर मूंड बुड गय,

अउ ऊ बोझा के जसना मोर सहै लग बाहिर होय गय हबै।

5मोर मूरुख के कारन कोडे लग

मोर खत्ता गंधाथै अउ सर गय हबै।

6मै बोहत दुखी हव अउ निहुर गय हव,

दिन भर मै दुख के पहिनावा पहिरे हर चलथों फिरथों।

7काखे मोर कनिहा हे बडी जलन हबै,

अउ मोर देह हे नांगा नेहको रहिस।

8मै ढिलवा अउ बोहत कमजोर लग भर गयों,

मै अपन मन के पीरा लग घबराहट लग कराहथो।

9हे परभु, मोर सगलू इक्छा तोर आगू हबै,

अउ मोर कराहना तोर लग लुके नेहको हबै।

10मोर हिरदय धडकथै, मोर बल घटत जथै,

अउ मोर आंखी के उजियार मोर लग जात रहै।

11मोर संगी अउ मोर साथी मोर समस्या हे अलगे हुइ गइन,

अउ मोर रिस्तेदारो दुरिहां जाय के ठाड हुइन।

12मोर परान के खोजइया मोर निता जाल बिछाथै,

अउ मोर नुकसान के परयास करैबाले बुराई बात बोलथै,

अउ दिन भर छल कपट के युक्ति सोचथै।

13पय मै बहिरा मनसे के जसना नेहको सुनथो,

अउ मै बउरा मनसे के जसना मुंह नेहको खोलथो।

14पय मै असना मनसे के बरोबरी हुइ गय हव, जउन कुछ नेहको सुनथै,

अउ जेखर मुंह लग झगडा के कउनो बात नेहको निकलथै।

15हे यहोबा, मै तोर हे अपन आसरा लगाय हव, हे परभु मोर भगवान,

तहिन जबाब दइहे।

16काखे मै कथो, असना झइ होय कि उन मोर हे खुसी करे,

जब मोर गोड बिछल जथै, तब उन मोर हे अपन बडाई मारथै।

17काखे मै तो अब गिरै हे हव,

अउ मोर पीरा लगेतार मोर आगू हबै।

18इहैनिता कि मै तो अपन अधरम के स्वीकार करहुं,

अउ अपन पाप के कारन दुखी हव।

19पय मोर बैरी चतुर अउ बलवान हबै,

जउन बेकार हे मोर लग घ्रना करथै, उन बोहत बढ गय हबै।

20जउन भलाई के बदला हे बुराई करथै,

उन भलाई के पाछु चलै के कारन मोर बिरोध करथै।

21हे यहोबा, मोके छांड झइ दे, हे मोर भगवान,

मोर लग दुरिहां झइ होय।

22हे परभु, हे मोर मुकति करे बाले, मोर सहायता के निता हरबी कर।