भजन 37

दुस्ट अउ निक्खा मनसे कर भाग

दाऊद कर भजन

1कुकरमिन कर कारन झइ कुढकुढावा,

टेढवा काम करै बालेन के बारे हे डाह झइ कर,

2काखे उन चारा के जसना हरबी कट जइहीं,

अउ हरियर चारा के जसना मुरझाय जइहीं।

3यहोबा हे यकीन रख, अउ भला कर, भुंइ हे बसे रह,

अउ सच्चाई हे मन लगाय रह।

4यहोबा हे खुस रहा,

अउ ऊ तोर मनोकामना के पूर करही।

5अपन रास्ता कर चिन्ता यहोबा हे छांड,

अउ ओहमा यकीन रख, उहै पूर करी।

6ऊ तोर नेक उजेड कर जसना अउ तोर नियाव दुपहरी के उजेड के जसना परगट करी।

7यहोबा कर आगू चुपचाप रह, अउ धीरज लग ओखर इन्तजार कर,

ऊ मनसे के कारन झइ कुढकुढावा जेखर काम सफल होथै,

अउ ऊ बेकार योजना के निकालथै,

8गुस्सा लग दुरिहां रह, अउ जलजलाहट के छांड दे, झइ कुढकुढावा,

ओखर लग बुराई निकलही।

9काखे कुकरमी मनसे काट डारे जइहिन,

अउ जउन यहोबा कर बाट जोहथै, उन भुंइ कर साहब हुइहीं।

10चुटु रोज के गुजरै पय दुस्ट नेहको रही,

अउ तै ओखर जिघा के भली भांति देखै उके नेहको पइहे।

11पय दीन मनसे भुंइ के साहब हुइहीं,

अउ बडी सान्ति के कारन खुसी बनइहीं।1

12दुस्ट नेक के बिरुध बेकार योजना निकालथै,

अउ ओखर हे दांत पीसथै,

13पय परभु ओहमा हंसी, काखे ऊ देखथै

कि ओखर रोज आमै बाले हबै।

14दुस्ट मनसे तलबार तीनिन अउ धनही चढे हर हबै,

ताकि दीन गरीब के गिरा दे,

अउ सीधा चाल चलामैबालेन हत्या करै।

15उनखर तलबारन लग उनखरै हिरदय छेदरी,

अउ उनखर धनुस टोर जही।

16नेक के चुटु लग डेरा दुस्टन के बोहत लग

डेरा बढिहा हबै।

17काखे दुस्टन कर भुजा तउन टोरे जही,

पय यहोबा नेक मनसेन के संभालथै।

18यहोबा खरा मनसेन कर उमर के सुधि रखथै,

अउ उनखर बिरासत कर भाग हरमेसा बने रही।

19मुसीबत के टेम उनखर आसरा नेहको टूटी, अउ न उन लज्जित हुइहीं,

अउ आकाल के रोज हे उन भरपूर हुइहीं।

20दुस्ट मनसे नस्ट हुइ जइहीं,

अउ यहोबा के बैरी खेतवा कर कांसा चारा के जसना नस्ट हुइहीं,

उन कोहिटा के जसना नास हुइ जइहीं।

21दुस्ट करजा लेथै, अउ नेहको भरथै,

पय धरमी दया करके दान देथै,

22काखे जउन ओखर लग आसीस पाथै, उन तो भुंइ के साहब हुइहीं,

पय उन मनसे जिन्ही परभु सराप दय हबै, उन नास हुइ जइहिन।

23मनसे कर रास्ता यहोबा कर पल्ला लग मजबूत होथै,

अउ ओखर चलन लग ऊ मगन रथै,

24चाहे ऊ गिरे तउमा पडे नेहको रह जही,

काखे यहोबा ओखर हाथ थामे रथै।

25मै जवानी लग लइके बुढापे तक देखत आय हव,

पय न तो कबहुन नेक के त्यागे हर,

अउ न ओखर बंस के भीख मांगत देखे हव।

26ऊ तो रोज भर अनुगरह करके उधार देथै,

अउ ओखर लरका हे आसीस फरत रथै।

27बुराई के छांड अउ भलाई कर,

अउ तै हरमेसा बने रइहे।

28काखे यहोबा नियाव लग माया रखथै,

अउ अपन बिस्वासओग मनसे के नेहको छांडी अउ न त्यागही।

उनखर रक्छा हरमेसा होथै,

पय दुस्ट कर लरका के काट डाले जही।

29नेक मनसे भुंइ के साहब हुइहीं,

अउ ओहमा हरमेसा बसे रइहीं।

30नेक अपन मुंह लग दिमाक कर बात करथै,

अउ ओखर जीभ नियाय के बात करथै।

31भगवान कर नियम ओखर हिरदय हे बने रथै,

ओखर गोड नेहको फिसलथै।2

32दुस्ट मनसे नेक मनसे के ताक हे रथै।

अउ ओखर मार डारै के परयास हे रथै।

33यहोबा नेक मनसे के ओखर हाथ हे नेहको छांडही,

जब नेक मनसे कर नियाय होही, तब ऊ दोसी नेहको ठहराही।

34यहोबा के ओरगत रह, अउ ओखर रास्ता हे बने रह,

अउ ऊ तोके बढायके भुंइ कर साहब कर देही,

जब दुस्ट मनसे काट डाले जही, ता तै देखिहे।

35मै दुस्ट के बडा पराकरमी अउ असना फइलत होय हर देखिस,

जसना कउनो हरियर रूख अपन खास भुंइ हे फइलथै।

36पय जब कउनो उहां लग गइस, ता देखिस कि ऊ उहां नेहको हबै,

अउ मै उके खोजो, पय कहुं नेहको पायों।

37खरा मनसे हे नजर कर अउ नेक के देख,

काखे मेल लग रहै बाले डउका के आखरी फडुहा निक्खा हबै।

38पय पापिन एक संग नास करे जही,

दुस्टन के आखरी परिनाम सगलू कुछ नास हबै।

39नेक मनसे के मुकति यहोबा कर पल्ला लग होथै,

समस्या के टेम ऊ उनखर मजबूत सहारा हबै।

40यहोबा उनखर मदत करके उनके बचाथै,

ऊ उनके दुस्टन मनसे लग छंडायके उनखर उध्दार करथै,

इहैनिता कि उन ओहमा सरन लय हबै।