भजन 36

मनसे कर दुस्टता

परधान बजामै बालेन के निता यहोबा के हरवाह दाऊद कर भजन

1दुस्ट जन कर अपराध मोर हिरदय कर भित्तर हइ कथै,

कि भगवान कर डर ओखर नजर हे नेहको हबै।1

2ऊ अपन अधरम के परगट होमै अउ घिरना ठहरै के बारे हे

चिकनी चुपडी बात बिचारथै।

3उनखर बात दुस्ट अउ झूठ लग भरे हबै, ऊ अब दिमाक बाले काम

अउ भलाई के काम नेहको करथै।

4ऊ अपन जठना हे पडे-पडे बेकार सोंच करथै,

ऊ अपन गलत रस्ता हे मजबूत लग बने रथै,

बुराई लग ऊ हाथ नेहको खींचथै।

भगवान कर अच्छाई

5हे यहोबा तोर करुना स्वरग हे हबै,

तोर सच्चाई आकास मंडल तक पहुंचे हबै।

6तोर धरम ऊंच डोंगर के जसना हबै,

तोर नियम गहीड समुन्दर ठहरे हबै,

हे यहोबा तै मनसे अउ पसु दुनो के रक्छा करथै।

7हे भगवान तोर करुना कसना अनमोल हबै,

मनसे के लरका तोर पोखडी कर तरी सरन लेथै।

8उन तोर भवन कर चीकन भोजन लग टुल्य हुइहीं,

अउ तै अपन सुख के नदिया मसे पानी पियाही।

9काखे जीवन कर झिरना तोर लिघ्घो हबै,

तोर उजियार के दवारा हम उजियार पउबे।

10अपन मनसेन हे माया करत रह,

अउ अपन धरम के काम सीधा मन बालेन हे करत रह,

11घमंडी मनसे के मोर उप्पर युध्द करै झइ दे,

दुस्ट मनसे मोके भगामै न पामै।

12उहां अन्यायी गिर पडे हबै, उन ढपेल दय गइन,

अउ फेर उठ नेहको सकहिन।