Bhumiya
भजन 35
बैरिन लग छुटकारा के निता बिनती
दाऊद कर भजन
हे यहोबा, जउन मोर संग मुकदमा लडथै, जउन मोर लग लडाई करथै,
उनखर लग तै लडाई कर।
ढाल, कवच अउ भाला लइके मोर मदत करै के ठाड हो।
बरछी के तान अउ मोर पाछू करैबालेन के आगू आयके उनके रोक,
अउ मोर लग गुठे कि मै तोर मुकति करै बाले हव।
जउन मोर परान के खोजइया हबै,
उन लज्जित अउ निरादर होय,
जउन मोर नुसकान के सोच करथै,
उन पाछू हटाय जाय अउ उन हार जाय।
उन पवन लग उड जायबाले भूसा कर जसना होय,
अउ यहोबा कर दूत उनके रगडत जाय।
उनखर रास्ता अन्धियारा अउ फिसलै बाले बन जाय,
अउ यहोबा कर दूत उनके रगडत जाय।
काखे बिना कारन के उन मोर निता अपन जाला गढहा हे बिछाइन बिना कारन के
उन मोर परान लेय के निता गढहा खोदे हबै।
पय एखर लग पहिलेन उन समझ पामै,
उनखर उप्पर नास आय पडही,
उन अपनै जाला हे फंस जइहिन, अउ नास हुइ जइहिन।
पय मै यहोबा के कारन अपन मन हे मगन हुइहों,
मै ओखर करे हर मुकति लग मगन हुइहों।
मोर हाडा-हाडा कहि, हे यहोबा तोर मेर कोनहर हबै,
जउन गरीब मनसे के बडे-बडे बलवान लग बचाथै,
अउ लुटेरन लग गरीब मनसेन के रक्छा करथै?
मोर बिरुध्द ठगरा गवाह ठाढ होथै, जउन बात मै नेहको जानथो,
उहै ऊ मोर लग पूछथै।
उन मोर लग भलाई के बदले बुराई करथै,
इहां तक कि मोर परान अब निरास हुइ गय।
जब ऊ रोगी रथै,
ता मै टाट पहिरे रहों,
अउ उपास कर करके दुख उठाउत रहों,
अउ मोर बिनती कर फल मोर गोंद हे लउट आइस।
मै असना भावना रखथों कि माना उन मोर संगी या भाई हबै,
जसना कउनो दाय के निता बिलाप करत होय
ओसनेन दुख कर पहिराबा पहिरे हर मूंड झुकायके सोक करों।
पय जब मै लडखडाय लगों ता उन मनसे मगन हुइके अकजिघा हुइन,
पापी मनसे अउ जिनके मै जानत नेहको रथों,
उन मोर बिरुध्द अकजिघा हुइन
उन मोके लगेतार फाडत रहिन।
उन पखंडी जउन मोर लादा कर निता मजाक उडाथै,
उन मोर हे दांत पीसथै।
हे परभु तै कब तक देखत रइहे? हइ समस्या लग,
जेहमा उन डाले हबै मोके छंडा जबान बघवा लग
मोर परान के बचाय ले।
मै बडा सभा हे तोर धन्यबाद करिहों,
बोहत झन के बीच मै तोर बडाई करिहों।
मोर ठगै बाले बैरी मोर बिरुध्द मगन झइ करै पामै,
जउन बिना कारन के मोर बैरी हबै,
उन आपस हे आंखी लग
इसारा झइ करै पामै।1
काखे उन मेल के बात नेहको बोलथै, पय देस हे जउन सान्तिपूरवक रथै,
उनखर बिरुध्द छल के बिचार करथै।
उन मोर बिरुध्द मुंह खोलके कथै,
आहा-आहा हम अपन आंखी लग देखे हबन।
हे यहोबा तै देखे हबस,
चुप झइ रह, हे परभु मोर लग
दुरिहां झइ रह।
उठ मोर नियाय के निता जाग, हे मोर भगवान हे मोर परभु,
मोर मुकदमा निपटामै के निता आ।
हे मोर भगवान यहोबा, तै अपन धरम के जसना मोर नियाय चुका,
अउ उनके मोर बिरुध्द मगन झइ करै दे।
उन मन हे झइ कहै पामै, आहा हमर इक्छा तो पूर हुइ गय,
उन हइ झइ कहै, हम उके लील लय हवन।
जउन मनसे मोर नुकसान लग खुस होथै,
उनखर मुंह लज्जा के मारे एक संग करिया होय,
जउन मोर बिरुध्द बडाई मारथै,
उन लज्जा अउ अनादर लग ढक जाय।
जउन मोर मनसे धरम लग खुस रथै,
उन जयजयकार अउ खुसी करे,
अउ लगेतार कहत रहै, यहोबा कर बडाई होय,
जउन अपन हरवाह के कुसल लग मगन होथै।
ता मोर मुंह लग तोर धरम कर चरचा होही,
अउ दिन भर मोर जीभ तोर स्तुति करत रइहों।
Source notes (1)
- Cross-reference यूहन्ना 15:25; भजन 69:4
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.