भजन 33

स्तुति कर गीत

1हे धरमी मनसे, यहोबा के कारन जयजयकार करा।

काखे इमानदार मनसे के स्तुति करै के सोभा देथै।

2बीडा बजा बजाय के यहोबा कर धन्यबाद करा,

दस तारबाले ताली सारंगी बजा बजाय के ओखर भजन गाबा।

3ओखर निता नबा गाना गाबा,

जयजयकार कर संग भली-भांति बजाबा।

4काखे यहोबा कर बचन सीधा हबै,

अउ ओखर सगलू काम सच्चाई लग होथै।

5ऊ धरम अउ नियाव लग माया रखथै,

यहोबा कर करुना लग भुंइ भरपूर हबै।

6आकासमंडल यहोबा कर बचन लग,

अउ ओखर सगलू गड1 ओखर मुंह कर सांस लग बने हबै।

7ऊ समुन्दर कर पानी ढेर के जसना अकजिघा करथै,

ऊ गहिरा सागर के अपन भंडार हे रखथै।

8सगलू भुंइ कर मनसे यहोबा लग डरै,

दुनिया कर सगलू निबासी ओखर भय मानै।

9काखे जब ऊ कथै, तब हुइ गय, जब ऊ आदेस दइस,

तब सहिमा ओसनेन हुइ गय।2

10यहोबा राज-राज कर चाल के बेकार कर देथै,

ऊ देस-देस के मनसेन कर योजना के बेकार करथै।

11यहोबा कर युक्ति हरमेसा स्थिर रही,

ओखर मन कर योजना पीढी लग पीढी तक बने रही।

12का धन्य हबै ऊ राज जेखर भगवान यहोबा हबै,

अउ ऊ मनसे जेही ऊ अपन खास भाग होय के निता चुन लय होय,

13यहोबा स्वरग लग तरी देखथै,

ऊ सगलू मनसेन के निहारथै,

14अपन निबास के जिघा लग

ऊ भुंइ के सगलू रहैबाले के देखथै,

15उहै सगलू मनसे कर हिरदय कर रचना करिस,

अउ उहै उनखर सगलू कामन के परखथै।

16कउनो राजा के मुकति सिपाही के सकति लग नेहको होथै,

कउनो बीर कर ताकत उके नेहको बचाय सकथै।

17बच निकरै के निता घोडवा बेकार हबै,

ऊ बडा बल के दवारा कउनो के नेहको बचाय सकथै।

18देखो, यहोबा कर नजर ओखर खोजै बाले हे अउ उनखर हे

जउन ओखर करुना के आसरा रखथै, बने रथै,

19कि ऊ उनखर परान के मिरतू लग बचाबै,

अउ अकाल के टेम उनके जिन्दा रखै।

20हम परभु हे आसरा रखथन,

ऊ हमर रक्छक अउ सहायक हबै।

21हमर हिरदय ओखर कारन खुसी होही,

काखे हम ओखर पवितर नाम हे भरोसा रखे हबन।

22हे यहोबा, जसना तोर हे हमर आसरा हबै,

ओसनेन तोर करुना हमर हे होय।