Bhumiya
भजन 31
भगवान हे बिस्वास कर बिनती
परधान बजामै बाले के निता दाऊद कर भजन
हे यहोबा,
मोर भरोसा तोर हे हबै,
मोके कबहुं लज्जित होय के नेहको पडिस,
तै अपन धरमी होय के कारन मोके छंडाय ले।
अपन कान मोर पल्ला लगा,
परभु देरी झइ कर मोके बचा ले।1
तहिन मोर सुस्ताय के जिघा अउ रक्छक हबस, मोके रस्ता देखा
अउ अपन टीमा कर जसना मोर अगुवाई कर।
जउन जाला उन मोर निता बिछाय हबै, ओखर लग तै मोके छंडाय ले,
काखे तहिन मोर मजबूत सहारा हबस।
मै अपन आतमा के तोर हाथ हे सउप देथों,
हे यहोबा, हे सत्यबादी भगवान,
तै मोके खरीद के अजाद करे हबस।2
जउन ठगरा अउ घमंडी चीजन हे मन लगाथै,
उनखर लग मै नफरत करथों, पय मोर भरोसा यहोबा हे हबै।
मै तोर करुना लग मगन अउ खुसी हबो,
काखे तै मोर दुख हे नजर करे हबै,
मोके दुख के टेम तै मोर सुधि लय हबस।
अउ तै मोके बैरी के हाथ हे पडै नेहको दय,
तै मोर गोडन के चउडा जिघा हे ठाड करे हबस।
हे यहोबा, मोर हे अनुगरह कर
काखे मै मुसीबत हे हव,
मोर आंखी पय मोर परान
अउ देह सगलू दुख के मारे झुराय जथै।
मोर जीवन दुख के मारे
अउ मोर उमर कराहत-कराहत घट गय हबै,
मोर बल मोर अधरम के कारन घट गइस,
अउ मोर हाडा घुर गइस।
अपन सगलू बिरोधिन के कारन मोर परोसिन हे मोर नामधराई हुइस,
अपन जान-पहिचान बालेन के निता डर के कारन हव,
जउन मोके रास्ता हे देखथै
उन मोर लग दुरिहां भग जथै।
मै मुरदा कर जसना मनसेन के मन लग बिसर गयो,
मै टुटहा बरतन के जसना हुइ गय हव।
मै कइ बैरिन के बुराई सुने हव,
मोर पल्ला हलचल मचे हबै,
उन मोर पल्ला योजना बनाथै,
मोके मार डालै के साजिस करथै।
पय हे यहोबा, मै तो तोर हे भरोसा रखे हबो, मै कथो,
“तै मोर भगवान हबस।”
मोर जीवन तोर हाथ हे हबै,
तै मोके मोर बैरिन अउ मोर सतामैबालेन के हाथ लग छंडा।
अपन हरवाह हे अपन मुंह कर उजियार चमका,
अपन करुना लग मोर मुकति कर।
हे यहोबा, मोके लज्जित झइ होय दे,
काखे मै तोके गोहराय हबो,
दुस्ट लज्जित होय
अउ उन मिरतू लोक हे चुप्पेचाप पडे रहै।
जउन घमंड अउ बेज्जति लग नेक मनसे कर बुराई करथै,
उनखर झूठ बोलैबाले मुंह बन्द करे जाय।
हे यहोबा, तोर भलाई का बडी हबै,
जउन तै अपन डरपोक के निता रख छांडे हबस,
अउ अपन सरनगतन के निता
मनसेन कर आगू परगट करे हबै।
तै उनही दरसन दइके सूनसान जिघा हे
मनसेन कर बेकार बातन लग गुप्त रखिहे,
तै उनके अपन गुफा हे
झगडा-लडाई लग लुकोय रखिहे।
यहोबा धन्य हबै,
काखे उनके मोके किला बाले सहर हे रखके
मोर हे अदभुत करुना करे हबै।
मै तो डेराय के कथों
कि मै यहोबा कर नजर लग दुरिहां हुइ गयों।
तउभरमा जब मै तोर दुहाई दयों,
तब तै मोर गिडगिडाहट के बिनती सुन लइस।
हे यहोबा के सगलू हरवाह, ओखर लग माया रखा,
यहोबा सही मनसेन कर रक्छा तो करथै, पय जउन घमंड करथै,
उके ऊ भली-भांति सजा देथै।
हे यहोबा हे आसरा रखैबाले,
मजबूत रहा अउ हिम्मत बाले बना।
Source notes (2)
- Cross-reference भजन 71:2
- Cross-reference लूका 23:46
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.