भजन 30

धन्यबाद कर बिनती

भवन कर परतिस्ठा कर निता दाऊद कर भजन

1इहैनिता हे परभु, मै तोर महिमा करथो, काखे तै मोके बचाय हबस

अउ मोर बैरिन के मोर उप्पर खुस होमै लग रोके हबस।

2हे परभु भगवान यहोबा, मै सहायता कर निता तोर दुहाई दयो,

अउ तै मोके चंगा कर दय।

3हे यहोबा तै मोर परान अधलोक मसे निकारे हवस,

तै मोके जिन्दा रखे,

अउ मरघटी हे पडै लग बचाय हबस।

4हे यहोबा के बिस्वासओग मनसे ओखर भजन गाबा,

अउ जउन पवितर नाम लग ओखर सुरता होथै,

ओखर धन्यबाद करा।

5काखे ओखर गुस्सा तो कुछ टेम कर निता होथै,

पय ओखर दया जीवन भर के निता होथै,

कबहुन रात के रोमै के पडी

पय सुबेन्ने खुसी मिली।

6मै अपन खुसहाली कर टेम हइ कथो,

मै हरमेसा अटल रइहों।

7हे यहोबा, अपन दया लग तै मोर डोंगर के मजबूत

अउ स्थिर करे रथस,

जब तै अपन मुंह फेर लय

तब मै डेराय गयों।

8हे यहोबा, मै तोके गोहरायों,

अउ यहोबा लग गिडगिडाय के हइ बिनती करो।

9जब मै मरघटी हे चले जइहों,

तब मोर खून लग काहिन लाभ होही?

का माटी तोर धन्यबाद कर सकथै?

का ऊ तोर सच्चाई कर परचार कर सकथै?

10हे यहोबा, सुन, मोके अनुगरह कर,

हे यहोबा, तै मोर सहायक कर।

11तै मोर निता दुख के खुसी हे बदल डारे,

तै मोर टाट उतरवाय के

मोर कनिहा हे खुसी के कपडा पहिरा।

12ताकि मोर मन तोर भजन गाउत रहै

अउ कबहुं चुप नेहको होय।

हे मोर भगवान यहोबा,

मै हरमेसा तोर धन्यबाद करत रइहों।