भजन 28

मदत कर निता बिनती

दाऊद कर भजन

1हे यहोबा मै तोहिन के पुकारहुं,

हे मोर पटपड मोर सुन-अनसुनी झइ कर,

असना झइ होय कि तोर चुप रहै लग

मै मरघटी हे पडे हर के जसना हुइ जाव,

जउन मिरतू लोक हे कढ जथै।

2जब मै दुहाइ कर निता तोके पुकारेव,

जब मै तोर पवितर जिघा के भीतरी कोठरी कर पल्ला अपन हाथन के उठाहुं, तब मोर गिडगिडाहट कर बात सुन ले।

3उन बैरिन अउ गलत काम करै बाले मनसे के संग मोके झइ घसीट,

जउन अपन परोसिन लग सान्ति कर बात बोलथै,

पय हिरदय हे बुराई रखथै।

4उनखर कामन के अउ उनखर कामन के बुराई के जसना उनखर लग बेउहार कर,

उनखर हाथन के काम कर जसना उनके बदला दे,

उनखर कामन के सजा उनके दे।1

5उन यहोबा के कामन हे

अउ ओखर हाथ के कामन हे धियान नेहको देथै,

इहैनिता परभु उनही नास करही,

ऊ फेर उनही निरमान नेहको करही।

6यहोबा धन्य हबै,

काखे ऊ मोर बिनती के सुने हबै।

7यहोबा मोर बल अउ मोर ढाल हबै,

ओहमा भरोसा रखै लग मोर मन के मदत मिले हबै,

इहैनिता मोर हिरदय खुस हबै,

अउ मै गीत गायके ओखर धन्यबाद करिहों।

8यहोबा अपन परजा कर बल अउ सहारा हबै,

ऊ अपन अभिसिक्त कर निता मुकति के मजबूत गढ हबै।

9हे यहोबा अपन परजा के मुकति कर,

अउ अपन खास भाग के मनसेन के आसीस दे,

अउ उनखर चरवाही कर

अउ हरमेसा उनके सम्हारे रह।