भजन 27

स्तुति कर बिनती

दाऊद कर भजन

1यहोबा भगवान मोर उजियार अउ मोर मुकति हबै,

मै केखर लग डेराव?

यहोबा मोर जीवन के आसरा हबै,

मै केखर लग डरो?

2जब कुकरमी मोके फार खांय के निता मोर हे हमला करथै,

ता उन मोर बैरी लडखडाय के गिर पडही।

3चाहे सिपाही मोर बिरुध्द घेरा डाले हबै,

तउभरमा मै नेहको डेराहूं,

चाहे मोर बिरुध्द लडाई युध्द हुइ जाय,

ऊ दसा हे मै हियाव बांधे निस्चित रइहों।

4अक्ठी बरदान मै यहोबा लग मांगे हबो,

उहै के परयास हे लगे रइहों,

कि मै जीवन भर यहोबा कर भवन हे रहै पइहों,

जेखर लग यहोबा कर सुन्दरता के देख सको,

अउ ओखर मन्दिर हे धियान करिहों।

5काखे परभु संकट के रोज मोके अपन मंडप हे लुको लइ,

ऊ अपन सिविर के भित्तर मोके आसरा देही,

ऊ मोके पथरा हे ऊंच उठाही।

6अब मोर मूंड मोर चउगिरदा पल्ला के बैरिन लग ऊंच होही,

अउ मै यहोबा कर तम्बू हे जयजयकार कर संग बलि चढाहुं

अउ ओखर भजन गाहुं,

7हे यहोबा मोर आरो सुन, मै पुकारथों,

तै मोर हे अनुगरह कर अउ मोके जबाब दे।

8तै कहे हबस, “मोर दरसन कर खोजइया हबस।”

इहैनिता मोर मन तोर लग कथै, “हे यहोबा तोर दरसन के मै खोजइया रइहों।”

9अपन मुंह मोर लग झइ लुका

अपन हरवाह के गुस्सा करके झइ टार,

तै मोर सहायक बने हबस।

तै मोर मुकति करै बाले

भगवान मोके झइ छांड।

10मोर दाय बाफ मोके छांड दय हबै,

पय यहोबा मोके सम्हार लइ।

11हे यहोबा अपन रास्ता हे मोर अगुवाई कर,

अउ मोर बैरी के कारन,

मोके सिध्धा रस्ता हे लइ चल।

12मोके मोर सतामै बालेन के इक्छा हे झइ छांड,

काखे ठगरा गवाह जउन उपदरव करै के धुन हे हबै,

मोर बिरुध्द उठे हबै।

13अगर मोर यकीन नेहको होतिस, कि जिन्दा के भुंइ हे यहोबा कर भलाई के देखहुं,

ता मै बिहोस हुइ जातों।

14यहोबा कर राह ओरगत रह,

हियाव बांध अउ तोर हिरदय मजबूत रहै,

हव, यहोबा कर राह ओरगत रह।