भजन 21

जीत कर स्तुतिगान

परधान बजामै बाले कर निता दाऊद कर भजन

1हे यहोबा तोर महिमा राजा के मगन करथै,

जब तै उके बचाथस ऊ बोहत मगन होथै।

2तै ओखर मनोकामना पूर करे हस,

तै ओखर बिनती के तै असुइकार नेहको करिस। (सेलाह)

3काखे तै बोहत आसीस देत हर ओखर लग मिलथस,

अउ तै ओखर मूंड हे सोना कर मुकुट पहिराथस।

4ऊ तोर लग जीवन मांगथै, अउ तै उके देथस,

तै उके हरमेसा के जीवन दय हवस।

5तोर दया के कारन ओखर महिमा जादा हबै,

तै उके पइसा अउ धन डेरा लग सजाय देथै।

6काखे तै उके हरमेसा के निता आसीसित करे हवस,

तै अपन आगू उके खुसी अउ मगन लग भर देथस।

7राजा यहोबा हे भरोसा करथै,

पय ऊ परम परधान भगवान कर

करुना दवारा मजबूत बने रही।

8तोर हाथ सगलू बैरिन के ढूंड निकारी,

तोर दहिना हाथ तोर सगलू बैरिन के पता लगाय लेही।

9तै अपन मुंह के आगू उनके बरत हर भठ्ठा के जसना जलाही,

यहोबा अपन गुस्सा हे

उनके लील लय जही,

अउ आगी उके भसम कर डारी।

10तै उनखर लरका के भुंइ हे मिटाय दइहे,

अउ उनखर वंस के मनसेन मसे नस्ट करहे।

11अगर उन तोर बिरुध्द बुराई करै चइहीं,

अउ उन तोर हानि के जुगाड बनइही पय सफल नेहको हुइ पइहीं।

12काखे तै अपन धनही उनखर बिरुध्द चढइहे,

अउ उन पिठार दिखायके भगहीं।

13हे यहोबा अपन सक्ति हे बडा होय,

अउ हम गा गायके तोर पराकरम कर भजन सुनाबे।