भजन 22

दुख के पुकार अउ खुसी कर गाना

परधान बजामै बाले कर निता अभ्यलेरसर राग हे दाऊद कर भजन

1हे मोर भगवान, हे मोर भगवान तै मोके काखे छांड दय,

तै मोर मदत काखे नेहको करथस? तै मोर पुकार काखे नेहको सुनथस?

मोर मुकति कछो हबै?

2हे मोर भगवान मै तोके दिन हे पुकारथों,

पय तै जबाब नेहको देथस,

रात हे मोके सान्ति नेहको मिलथै।

3पय तै जउन इस्राएल के स्तुति के सिहांसन हे बिराजमान हवस,

तै तो पवितर हवस।

4हमर पुरखन तोर हे भरोसा करथै,

उन भरोसा करत रथै अउ तै उनके छंडाथस।

5उन तोके पुकारिन, अउ तै उनके छंडाय हस,

उन तोर हे भरोसा करथै अउ कबहुन लज्जित नेहको होइन।

6पय मै मनसे नेहको किरवा हव, मनसे दवारा मोर नामधराई हबै,

अउ मनसेन हे मोर अपमान होथै।

7मोके देखै बाले मोर मजाक उडाथै,

उन बिबडा डोलाय के मूंड हिलाय के हइ कथै।

8उन हइ कथै, यहोबा हे बोहत जादा बिस्वास करथस,

ता ऊ तोके काखे नेहको बचाथै?

ऊ तोर हे खुस हबै,

ता ऊ तोके काखे नेहको छंडाथै?

9ऊ तहिन रथस, जउन मोके गरभ लग निकारे हबस,

तहिन मोके दाय के गोद हे बिस्वास करै के सिखाय हस।

10मै जनम लग तोर हे सउपे गय रथै,

दाय के पेट लग तै मोर भगवान हबस।

11मोर लग दुरिहां झइ हो काखे संकट लिघ्घो हबै,

अउ कउनो मदतगार नेहको आय।

12बोहत लग दुस्ट बिजरन कर जसना मोके घेर लय हबै,

बासान पतेरा के बलवन्त बिजरा मोर

चउगिरदा पल्ला मोके घेरे हर हबै।

13उन फारै अउ गरजै बाले बघवा के जसना

मोर हे अपन मुंह फारे हर हबै।

14मै पानी के जसना बहि गयों,

अउ मोर सगलू हाडा के जोड उखड गइस

मोर हिरदय मोमबत्ती बन गइस,

ऊ मोर देह के भित्तर पिघल गय हबै।

15मोर नटेरी धूर के जसना सूखाय गय हबै,

अउ मोर जीभ मोर मुंह के जबडा लग चिपक गइस,

तै मोके मरै कर निता छांड दय हबस।

16काखे कुकरा मोके घेर लय हबै,

कुकरमिन कर मंडली मोर चउगिरदा पल्ला मोके घेरे हर हबै,

उन मोर हाथ अउ मोर गोड छेदथै।1

17मै अपन सगलू हाडा गिन सकथों,

उन मोके देखथै अउ निहारथै।

18उन मोर बन्डी अपन हे बांट डालथै

अउ मोर कपडा हे चिट्ठी डालथै।

19पय हे यहोबा तै दुरिहां झइ रह,

हे मोर सहायक मोर सहायता के निता हरबी कर।

20मोर परान के तलबार लग बचा

मोर परान के कुकरा के पंजा लग बचा।

21मोके बघवा के मुंह लग बचा,

पतेरा के बिजरा कर सींग मसे तै मोके बचाय लय हबस।

22मै अपन भाइन के आगू तोर नाम के परचार करिहों,

मंडली के बीच मै तोर परसंसा करिहों।

23हे यहोबा के डेराय बाले ओखर स्तुति करा,

हे याकूब के वंस तुम सगलू ओखर महिमा करा,

हे इस्राएल के वंस तुम ओखर भय माना।

24काखे ऊ दुखी के बेकार नेहको जानिस अउ न ओखर लग घिरना करथै, यहोबा ओखर लग अपन मुंह नेहको लुकोइस,

पय जब ऊ ओखर दुहाई दइस,

तब ओखर सुन लइस।

25बडी मंडली हे मोर स्तुति करै के तोर पल्ला लग होथै,

मै अपन टीमा के

ओखर भय रखै बालेन के आगू पूर करिहों।

26दीन मनसे खाना खाय के अघाय जइहीं,

जउन यहोबा के खोजइया हबै उन ओखर स्तुति करहीं,

तुम्हर परान हरमेसा जिन्दा रही।

27भुंइ के सगलू दुरिहां-दुरिहां देसन के मनसे उके सुरता करहीं,

अउ ओखर पल्ला फिरहीं,

अउ राज-राज के सगलू कुर तोर आगू आराधना करहीं।

28काखे राज यहोबा के हबै

अउ सगलू देसन हे उहै सासन करथै।

29भुंइ के सगलू अहंकारी परभु के आगू झुकहिन,

ऊ जउन खुदय के जिन्दा नेहको रख सकथै,

अउ उन जउन माटी हे मिल जथै घुटवा टेकहिन।

30अक्ठी पीढी ओखर सेबा करहीं,

दूसर पीढी लग परभु के वरनन करे जही।

31उन ओखर धारमिकता कर परचार करहीं,

अउ अबे तक बिगर पइदा मनसेन के घोसना करहीं, ऊ हइ करिस।