भजन 20

जीत कर निता बिनती

परधान बजामै बाले कर निता दाऊद कर गाना

1हे यहोबा समस्या कर रोज तोके जबाब दे,

याकूब कर भगवान तोर मदत करै।

2ऊ अपन पवितर जिघा लग तोर मदत करै,

अउ ऊ सिय्योन डोंगर लग तोके सहारा दे।

3भगवान तोर सगलू भेंट के सुरता रखै,

अउ तोर सगलू आग कर बलि के स्बीकार करै। (सेलाह)

4ऊ तोर इक्छा के पूर करै,

ऊ तोर सगलू योजना सफल करै।

5हम तोर जीत हे जयजयकार करी,

हम अपन भगवान कर नाम लग झन्डा फहरई,

परभु तोर सगलू निबेदन स्बीकार करै।

6अब मै जान गयों, कि यहोबा अपन अभिसिक्त के मुकति करथै,

ऊ अपन दहिना हाथ के मुकति करे बाले सक्ति लग

अपन पवितर स्वरग लग सुनके उके जबाब देही।

7कउनो के रथ हे,

अउ कउनो के घोडवन हे भरोसा हबै,

पय हम तो अपन भगवान यहोबा कर नाम लइबे।

8उन झुक गइन अउ गिर पडिन,

पय हम उठन अउ सिध्धा ठाड हवन।

9हे यहोबा राजा के बचा ले,

जब हम तोके पुकारब तब हमर मदत कर।